Ich Chunrat von Liechtenekk vnd ich Johanna, sein hausfraw Vnd vnser Erben Wir veriehen - daz wir - mit vnsers Amptmanns hant hainreichs des Wu^erffels, ze den zeiten amptmann Vnser Vrowen Gozhaus ze Neunburch - verchaufft haben drew phunt gelts vnd ainen sibenzikh phenning gelts Wienner mu^enzz gelegen ze Otachring auf Weingarten in dem Waedakher vnd auf dem Amaispach - vmb acht vnd zwainzikh phunt Wienner phenning - den Erwirdigen herren, hern Ortolffen von Volchensdorf, ze den zeiten Probst ze Neunburch, Vnd dem Convent daselben dew es zu den zwelf Cherzen auf dez Seligen Margrafen Grab gemacht vnd gewidempt haben - Geben wir dem vorgenanten Gozhaus den brief Versigelten mit mein vorgenants Chu^enrad von Liechtenekk aygen insigil, Vnd mit meins obgenanten amptmanns insigil, hainreichs des Wu^erffels, darzu haben wir gepeten meinen Swager, hern Chraften den hauser, daz er der sach zeug sey mit seinem Insigel. Der brief ist geben - dreuzehen hundert Jar darnach in dem Sechs vnd Sechzigisten iar an sand Elspeten tag.

Source Fulltext: ZEIBIG, Klosterneuburg (=FRA II/10, Wien 1857) S. 420-421