Ich Ott von Wildunsmaur vnd Ich Margret sein Swester, hern Stephans hausvrow von Topel, ze den zeiten hofmaister dez Edeln hochgeporn fu^ersten herczog Leupolts in O^esterreich, wir veriehen - Daz vnser mueter vrow Elspet von Lasenhaim saelige - geschaft vnd geben hat vnserm lieben O^ehaim, Dem erbern herren Brobst Ortolfen zu Newnburch dem Volkenstorffer ir haus vnd waz dorzu gehO^ert gelegen in dem Grashof ze Newnburch durch der lieb vnd trewn willen, dew si zu im gehabt hat, daz er sich irs geschefts an irn lesten zeiten vnderwunden hat vnd auch alles dez gelts, daz si gelten scholt hincz Juden vnd hincz Christen verfangen hat vnd auch ir Pivilde den ersten vnd den sibenten vnd den Dreizzigisten begangen hat, dorzu hat sich auf daz egenant haus geschaft vier ewig iartag, ain mit zwain phunt geltes in der Chorherrn Oblay ze Newnburck, ain mit ainem phunt geltes in die Gustrey, ain mit ainen phunt geltes in daz vrowenchloster, vnd ain mit ainen phunt geltes zu der pharre hincz sand Mertein, dew man ir vnd irn vodern Jaerleichen begen schol, alz gewonhait ist, Daz man ander iarteg beget in dem gotshaus ze Newnburch - Mit vrchunde dez priefs - versigilten mit mein Otten insigil von Wildungsmaur, vnd swenne ich egenante Margret selb nicht aigen insigil enhab, dez verpint ich mich mit mein trewn vnder meins wirt Insigel hern Steffans von TO^eppel - Dez ist auch gezeug mit seinem Insigil haym von Geroltstorf, ze den zeiten hofmaister dez Goteshaus ze Newnburch. - Der prief ist geben - Dreutzehen hundert Jar darnach in dem Acht vnd sechczigistem Jar an sand ypoliten tage.

Source Fulltext: ZEIBIG, Klosterneuburg (=FRA II/10, Wien 1857) S. 424-425