Ich Maister Gerung, Chorherr ze Pazzaw zden zeiten pfarrer ze Valkchenstain vergieh - das ich - geben han meinem Oheim Albern von fuersprunn - meinen hof gelegen datz pirbaum pey Lenczenloch, der weilent dez Chiener gewesen ist - mit also auzgenomener rede, daz er vnd sein erben - furbaz ewichleichen da von dienen vnd raichen schullen zu sand Lorenczen Gotshaus daselb ze pirbaum alle iar ain halb phunt wienner phennig zu den zwain tagen im Jar, Sechzig phennig an sand Michels tag vnd Sechzig phennig an sand Jorigen tag, Also daz der zechmaister den selben dinst innemen sol vnd die liecht domit verwesen auf sand Larentzen alter in dem egenanten Gotshaus zu dem Gotsdienst, zu dem ampt vnd zu mezzen mit wizzen der pfarrlaeut daselbes. Vnd was denn dez egenanten halben phunt gelts vber die liecht ierleichen vberwirt, da schol der zechmaister die andern liecht in dem egenanten Gotshaus mit pezzern mit der pfarrlaeut wizzen, als ver es geraichen mag - Dor vber so gib ich im den prief - versigilten mit meinem Insigel, vnd mit dez erbern geistleichen herren Insigel hern Nyclas des floyts, die zeit Chorherr vnd obrister Chelner vnser vrawn gotshaws ze Newnburch vnd mit Vlreichs insigil, dez egendorfer, vnd mit fridreichs Insigil von pirbawm - Der brief ist geben - drewczehen hundert Jar darnach in dem acht vnd Sechczigistem iar an vnser vrawn tag zder Schidung.

Source Fulltext: ZEIBIG, Klosterneuburg (=FRA II/10, Wien 1857) S. 425-426