Ich Maister Tenichel der Jud, ze wienne, Patusch aydem von perchtolczdorf vergich - das ich - mit des erbern manns hant, hern Vlreichs von Rust, ze den zeiten Ambtman des klosters ze newnburk verkauft han meinen weingarten gelegen do selbens ze Newnburgk Auf der laymgrueb, des ein halbs Jeuch ist, zenechst Jorgen weingarten des Graidner do man von dem egenanten meinen weingarten alle iar dient dem kloster zu newnburgk anderthalben Emmer weins ze perkrecht vnd drey phenning ze voitrecht - vnd ist auch mir derselb weingarten fu^er haubtguet vnd fur schaden verstanden von hannsen von haslach von frawn Agnesen, seiner hausfrawen vnd von irn Erben, als mein geltbrief sagt, vnd den ich auch mit frag vnd mit vrtail vor offem gericht in mein gewalt erlangt vnd behabt han, als der gerichtbrief sagt, der mir daruber gegeben ist - vmb Siben vnd dreissigk phunt wienner phenning - Thoman von Everding, zu den zeiten des erbern herrn Hern Niclas des Dechant ze Newnburgk schaffer, vnd seinen erben - So geben wir In den brief - versigilten mit des vorgenanten Ambtmans Insigel Vlreichs von Rust, vnd mit der Erbern lewt Insigeln, Jorigen pey dem Tor, purger zu Newnburgk vnd Vlreichs des Guntzpurger, purger ze wienne - Der brief ist geben ze wienne - drewzehenhundert Jar darnach in dem drew vnd Sybenczigistem Jar an Sannd Lorenczen tag.

Source Fulltext: ZEIBIG, Klosterneuburg (=FRA II/10, Wien 1857) S. 453-454