Wir Albrecht von gotes genaden herczog ze Osterreich, ze Steyr, ze Kernden vnd ze Krain, Graf ze Tyrol etc. bechennen - vmb die vier vnd fumfczig Jeuchart Akchers vnd drew tagwerich wismats vnd am Vischwaid gelegen ze Aczenprukk, vnd ain holz ze Grekking die vnser getrewer Weikhart von dem Stain von vns ze lehen gehebt vnd nu ze kauffen geben hat den erbern geistlichen vnsern lieben andechtigen n. dem Probst vnd dem Capitel ze Newnburg, Daz wir durch got lauterlichen ze hilffe vnd trost vnserer vorvordern seligen, vnserselbs vnd auch vnser Nachkomen vnd Erben solen die Aygenschaft derselben gu^eter demselben goczhaus gegeben haben vnd geben auch wissentlich mit disem briefe Also daz der Probst vnd die Korherren daselbs welich ye zu den zeiten da sind, dieselben Wismat, Ekcher, Vischwaid vnd holcz mit allen nuczen vnd rechten nv furbas niezzen, beseczen vnd entseczen sullen, alz ander ir aigne gu^eter, vnd wellen wir auch ir scherm darauf sein vor gewalt vnd vor vnrecht an gever. Mit vrchund dicz brief's. Geben ze Wienn an Eritag nach dem Suntag Invocavit in der Vasten - dreuczehen hundert Jar vnd darnach in dem Achczigisten Jare. D. Dux per se et d. R. Wechinger.

Source Fulltext: ZEIBIG, Klosterneuburg (=FRA II/28, Wien 1868) S. 4