Ekchardus Canonicus Ratisponensis Subcollector censuum et mediorum fructuum Camere apostolice in dyoc. Patav. per reverendum in Christo patrem dnum. Ortolfum decanum Salczpurgensem per provinciam Salczburgensem et nonnullas alias partes almanie collectorem principalem auctoritate apostolica specialiter deputatus. Tenore presencium publice confitemur et ad noticiam cuiuslibet intuentis deducimus, nos realiter recepisse per manus honorabilis viri Domini Thome vicarii Chori ecclesie patav. decem florenos auri de vngaria nomine et pro reverendo patre dno. Cholmanno preposito Beate Marie Monasterii in Newburga ord. s. Benedicti (sic) Can. Reg. patav. dyoc. de neglecto debito censu camere apostolice occasione vnius Bysancii, in quo predictum Monasterium singulis annis in signum exempcionis obligatum exstitit, de quibus quidem decem florenis auri, sicut premittitur solutis et receptis ipsum dnum. Chollmannum prepositum ac eius monasterium quittamus, liberamus et absolvimus ac quitum harum serie litterarum pronunciamus et declaramus per pactum de vlterius non petendo ipsumque dnum. prepositum a sentenciis excommunicacionis, suspensionis et interdicti, si quas ob defectum retardacionis solucionis neglexerit absolventes nec non super irregularitate, si quam incurrerit celebrando divina vel inmiscendo se illis dum tamen in contemptum clavium non contraxerit, secum dispensantes. In quorum testimonium presentes quittacionis litteras fieri fecimus et nostri sigilli appensione communiri. Dat. Patav. XIII. mensis februarij M°. CCC°. LXXXIIII°.

Source Fulltext: ZEIBIG, Klosterneuburg (=FRA II/28, Wien 1868) S. 23-24