Ich Pawl, Vlreichs des alten Spitalmaister Sun zu Newnburgk, dem got genad, vnd dy zeit chorherre ze Sekaw vnd mein erben vergehen - Das ich mit vrlab meins prelaten, des Erwirdigen herren, hern Vlreichs probst zu Sekaw - vnd mit meins pergmaister hant Albrecht von pirpawm dy zeit pergmaister vnser frawn gotzhaws zu Newnburgk klosterhalben - verkauft han ain halbs Jeuch weingarten, genant das Gugell, vnd leit vntter der langen gassen zu nachst der chamer pewnt, das mir mein egenanter vater vlreich, dem got gnad, geschafft hat ledigklich, vnd das gescheft also vor offem Rat peweist ist warden von den gescheftherrn, vnd das also in Ir Stat puch geschriben haben, do man alle iar von dient vnser frawen gotzhaws anderthalben emmer weins zu Perckrecht vnd drey wienner phenning ze voytrecht zu dem etaiding im iar - vmb vir vnd dreissick phunt wienner phenning - dem Erwirdigen meim genadigen herrn Brobst Kolman vnser frawn gotshaws zu newnburgk klosterhalben, der ez geben vnd gemacht hat zu vnser frawn Altar in der schön kappellen zu dem Salve regina das man all Samcztag nacht singt in der schön kappeln, als der Vrkund brief sagt, den er zu dem Altar geben hat mit des Convents Insigel - Auch han ich in gegeben - mit dem brieff drey gancz versigelt prieff, zwen kaufbrief, dy sagent, das mein egenanter vater den ege-nanten weingarten gekaufft hab witiber weis, der dritt ist ein vrlaub brief, der sagt, das Graf Albrecht von Otting seim kapplan erlaubt hab zu verkauften ain virtail aus dem egenanten weingarten - Vnd des zu vrchund der sach, wann ich egenanter paull nicht aigen Insigel han, So gib ich vnd mein erben in den brieff versigelt mit des egenanten Pergmaister insigel vnd mit der zwairer erberer mann insigel, Symonns des wisentz sun auf dem anger, vnd Fridreichs des keydinger, dy zeit paid des Rats der stat zu Newnburgk - Der brief ist geben an Sand Blasy tag - drewczehn hundert Jar‚ dar nach in dem Sechs vnd achczigistem Jare.

Source Fulltext: ZEIBIG, Klosterneuburg (=FRA II/28, Wien 1868) S. 35-36