Wir Berchtolt von gotes genaden Bischof zu freisingen Bechennen fu^er vns vnd Lewpolten vnd Berchtolten von Wehingen gebru^eder, vnser lieb vettern, fu^er die wir vns Wissentleich angenomen haben, wann die zu iren beschaiden Jaren noch nit komen sind vnd fu^er all vnser vnd ir freunt vnd Erben, Das wir - durch sunderr dienst vnd vrewntschaft, die vns der erber Michel der Tu^ocz vncz her erzaigt hat, vnd hinfu^er wol erczaigen mag ainer solicher freuntschaft gemechtnu^ozz, geschefft, Aynigung vnd Ordnung mit demselben Micheln dem Tu^oczen sein vberain worden, als hernach geschriben steet. Des ersten daz wir in in gu^oter steter gnad, frewntschafft, hilff, Rat vnd scherm halten sullen vnd wellen, vnd Im geholffen sein vor gewalt vnd vnrecht nach allem vnserm vermu^ogen vngeverleich. So sol er vns auch ze gleicher weise trewlich dinstleich, frewntleich vnd hilflich sein nach allem seinem vermögen vngeverleich. Darnach haben wir anstat vnserselbs vnd der obgenanten Lewpolten vnd Berchtolten von Wehingen dem vorgenanten Micheln vermacht vnd geschafft, schaffen vnd machen Im auch wissentleich fu^er vns vnd all vnser vnd ir Erben mit krafft dicz gegenwu^ertigen briefs Die hernach geschriben vnser weingerten vnd hewser. Des ersten das vnder Jeuch in dem vndern Gerewt ze nachst Hainreichen Albem, dint dem herczogen zehen Emmer fu^er Perchrecht vnd zehent. Item ain halbs Jewch in dem obern gerewt zenechst Hertlein von Chassaw, dint dem herczogen vir emmer fu^er perchrecht vnd zehent. Item ain halb Jewch in dem vndern Gerewt, haist daz mulingerl, dint dem herczogen fu^er perchrecht vnd zehent fumf emmer. Der vorgenant dreyr weingarten ist Amptman Niclas Weispacher, Chellermaister des herczogen in Osterreich ¹).Item ain halbs Jewch hinder der Stat, dint dem herczogen zwen vnd dreissig phenning Gruntrecht Michahelis, Des ist Pergmaister Hainrich flocz. Item fumf virtail in dem weingraben ze nachst des von freising weingarten, dint vnser vrawn Gotshaws zu Chlosternewnburg drey emmer vnd drew virtail perkchrecht vnd Achthalben phenning voitrecht. Item des Christanne halbs Jewch am Gebling, dint vnser vrawn Gotshaus ze Chlosternewnburg anderthalb emmer perchrecht vnd Voitrecht, als von alter herkomen ist. Item der Schonn leitgebn Rahen am gebling, dint vnser vrawn gotshaws ze Newnburg Anderthalb virtail perchrecht vnd ainen helbling voitrecht. Item ain halbs Jewch auf der laymgrub zenachst Erharten von Rust, dint vnser vrawen Gotshaus zu Newnburg Anderthalb Emmer perchrecht vnd drey phennig voitrecht. Item daz Ra^ehel an der Weidnichleitten, dint vnser vrawen gotzhaus ze Newnburg Newn Stauff perchrecht. Item drew virtail pei der Mu^ol zenachst dem Plodlein, dint vnser vrawn Gotshaus ze Newnburg Newn virtail perchrecht vnd voitrecht, als von alter herkomen ist. Item Ain drittail ains Jewchs genant daz Grawsel, dint vnser vrawen gotzhaus ze Chlosterneunburg Ainen Emmer perchrecht vnd zwen phennig voitrecht. Item Esenhaimer mawtterin am Newsidel, ist drew virtail, dint vnser vrawn gotshaus ze Chlosterneuburg zehen phennig gruntrecht auf Martini. Der vorgenanten acht weingarten ist Johannes bey dem tor Bergmaister von des obgenanten vnser frawen Gotshaus wegen ze Chloster Newnburg. Item drithalben Rahen in dem Hentleinsgraben zenachst den furhawppen, dint dem Gotshaus zu Pawmgartenperg anderthalben Emmer perchrecht vnd drey phennig voitrecht. Item ain halb Jewch an dem Aychweg zenachst der chlosterfrawn von Slierbach, dint dem gotshaus zu paumgartenperg Anderthalben Emmer perchrecht, vnd drey phennig voitrecht. Item ain virtail in dem Geswent, haist der Tentler, dint dem gotshaus zu paumgartenperg drew virtail perchrecht vnd drey helbling. Item virdhalb Rahen, genant der Mawsel dint dem gotshaus von paumgartenperg ainen emmer vnd drey Stauff perchrecht vnd zwen phennig voitrecht. Der obgenanten Vir Weingarten ist Pergmaister hanns Plodel zu Chlosternewburg von des obgenanten Gotshaus wegen ze Paumgartenperg. Item drey Rahen in der Eben, zenachst der Pekchen weingarten, dint vnser vrawn Gotshaus zu Chlosternewnburg Drithalb vnd zwainzig phennig ze gruntrecht, des ist Amptmann Seifridus Stekch zu Chlosternewburg. Item ain virtail, haist daz Edel in dem Wolfgraben zenachst dem Vasszieher, dint dem von Chunring drew virtail perchrecht vnd drei helbling voitrecht. des ist Pergmaister Vlreich der fluschart zu chlosternewnburg. Item drew virtail zeMukaraw, genant der Schreiber, dint des Schekchen kind drew virtail perchrecht, fumf helbling voitrecht. Item drew virtail an Mukrawer perg zenachst dem Porlein, dint des Schekchen kinden Anderthalb Emmer perchrecht vnd drey phennig voitrecht, der obgeschriben zwair weingarten ist heinrich flocz pergmaister. Item ain Jewch in dem veltgraben, genant der Liechthauber, dint dem Chraft von passaw drey emmer perchrecht, des ist pergmaister Johannes Stengel. Item ainhofstat an dem Newsidel, ist freis Aygen. Item ain haus in der fulsingergassen mit garten mitsampt, do man von dint vnser vrawn gotzhaus ze Chlosterneuburg vir vnd dreissig phennig zu gruntrecht Martini, des ist Amptmann Seifrid Stekch. Item ain haws, das fridreichs des Wernharts gewesen ist ze nechst Vlreichen dem Chra^ewttrer mit garten mitsampt, daz ist freis Aygen. Item ain Cheller bei der Chuchen, den wir gechawfft haben von Mert Rienolten, vnd dint den von Lichtenstain von Muraw vir phennig Gruntrecht Martini ‚ des ist Amptmann Vlreich Sneider am Newsidel. Item ain haws in der fulsingergazzen, das wir chauft haben von biberlein dem leczelter, dint vnser vrawcn gotshaus zu chloster newnburg fumfzehen phennig gruntrecht Martini, des ist Amptmann Seifrid Stekch - Also, wann der Almechtig got vber die vorgenanten Lewpolten vnd Berchtolten gepru^eder gepewtt, vnd das si all baid mit dem tod abgen, vnd kainen leiberben hinder In liessen, des got nicht engeb, daz dann all ir vorgenant weingarten, pawmgerten, keller vnd hewser mit aller zugehorung auf den obgenanten Micheln - erben vnd gevallen sullen. Doch halten wir vnsern vorgenanten vettern vor vnd nemen in auch aus Wissentleich mit dem brief zwayhundert phunt wienner phennig di si allpaid mit einander auf den vorgenanten weingerten vnd hewsern mugen iren eeleichen hausvrawen - verschreiben - vnd auch hundert phunt wienner phennig, die Sew durch Ir baider Selenhail willen mugen verschaffen, wem si wellen - auch das si - dem vorgenanten Micheln dem Tuczen - geben vnd raichen sullen, di weil er lebt, Sechczig phunt wienner phennig - Des zu vrchund geben wir - den brif versigilt mit vnserm Insigil vnd darzu mit vnsers lieben getrewn Eberharts von Chnoringen, vnnsers Chanczier, vnd mit Hannsen von Rautti, vnsers lieben Ohaim anhangunden Insigeln - vnd auch mit der egenanten Gruntherren Amptleut Insigeln - Der geben ist ze Wienn - dreuczehen hundert Jar darnach in dem Sechs vnd Newnczigistem Jare an sand Lucie tag.

Source Fulltext: ZEIBIG, Klosterneuburg (=FRA II/28, Wien 1868) S. 85-88