Ich Michel der Tucz von Newnburg klosterhalben Bechenn - hdaz ic- mein geschefft getan hab -als ich will vnd mein, daz es beleiben sol ich sterb, oder ich genezze - Des ersten hab ich bedacht vnd angesehen die grossen freuntschaft vnd guttet, die meinem vatter vnd meinen vorvordern selig vnd sunderlich mir von probst Kolman seliger gedechtnuzz vnd auch von yecz meinem lieben herren Petern vnd dem Goczhaus ze Newnburg klosterhalben manigvaltigklich geschehen vnd erczaigt sind, bey den ich mein wonung vnd wesen lang zeit gehabt hab, vnd von den ich auch vil gu^elt vnd leibgeding ingenomen hab. Darumb so hab ich ze erchantnuzz der vorgeschriben guttet, vnd auch ob ich das Goczhaus in dhainen Sachen vbernossen hett zu einer ergeczung dem vorgenanten Probst Petern, seinen nachkomen vnd Goczhaus lediglich vnd genczlich aufgeben - all mein hab, erb, liggent vnd varend gult vnd nu^ecz vnd was ich hab, nichts ausgenomen, Also daz der vorgenant probst Peter, dem ich vor menigklich sunderlich darin getraw, davon mein bevuild Jartag vnd ander meiner sel hail ding ausrichten sol - vnd mit dem vorigen allen soll derselb Probst vnd sein Goczhaus tun vnd lassen, handeln vnd schaffen nach irem willen - Wer auch, daz ich genes, so soll mich der obgenant probst - versorgen vnd ausrichten mit gewand, kost vnd ander meiner notdurft - Darnach hab ich bedacht die sunder gnad vnd freuntschaft, die mein lieber herr der bischof von freising vnd sein bru^eder selig Reinhart von Wehingen, mein steufvater, vnd her Albrecht selig von Wehingen, mein bruder mir mannigvaltiklich erczaigt haben, Vnd hab mein news haws ze Newnburg gelegen an dem obern markt ze nechst an dem Vorster vnd das weilent syfreydes des statschreiber gewesen ist, mit seiner zugehorung durch meiner sel hail willen geschafft vnd gemacht zu der kapelln vnd messen, die die vorbenanten mein herren in dem kreuczgank ze Neunburg gestift habent, Also das ain yegleicher weltlicher kapplan derselben kappeln - das Innhaben, nuczen vnd besiczen sol - Darzu schaff ich demselben meinem herren von freisingen vnd leupolten vnd Berchtolten von Wehingen, seinen Vettern den brief, den ich hab von dem egenanten Reinharten von Wehingen vnd andern selbgscholn, vnd der da lautt, daz si mir schuldig seyen Sechs hundert phunt wienner phennig. derselben si mich aber gewert vnd ausgericht haben vier hundert phunt phennig vnd mir noch nicht mer schuldig sint dann zwaihundert phunt phennig, derselben brief vnd phennig sag ich si all genczlich ledig vnd los - Ich main auch vnd will, das das gemecht, daz ich vormals den egenanten Wehingern vnd si mir besunder gegen einander getan haben nach laut vnser brief - beleiben sol bey allen seinen krefften. Ich schaff auch meinem vetter dem czirnacz mein viertail des weingartens gelegen an dem gebling, vnd das mit einem wechsel von dem gotshaus an mich komen ist - Des gib ich - den brief versigelt mit meinem angehangen insigel, vnd darczu mit des Erwirdigen meins lieben herren hern Berchtolts Bischofs ze freysingen, vnd der erbern Eberharts von Knoringen, Chunrats von Wehingen, hern Peters pfarrer ze schu^efelorn, Hainreichs des Flo^ezzer vnd Johannes pey dem Tor, die zeit purger vnd auch rat daselbs ze Neuwburg anhangenden Insigeln. - Der geben ist ze Newnburg klosterhalben an Eritag nach aller heiligen tag - Drewzehen hundert Jar vnd in dem Acht vnd Newnczigsten Jar.

Source Fulltext: ZEIBIG, Klosterneuburg (=FRA II/28, Wien 1868) S. 95-96