Ich Johann der Wogawer, Bacc. arcium, zu den zeiten pharrer ze Challnperg vergich fur mich vnd fur all mein nachkomen - vmb die gnad vnd andacht, so der erber man hanns pey dem Tor purger ze Newnburg chlosterhalben zu der egenanten meiner pharrchirchen gehabt hat, das er - dapey gewidempt vnd gestift hat ein ewige frumezz vnd ain ewiges li^echt - vnd hat darczu gewidempt vnd geben vorerst ein hofstat weingarten gelegen ze Newnburk in der aussern Cholergassen zenechst Merten hofstat in dem Techenthof, vnd ein viertail weingarten in dem Pregarten, zunechst des wielants weingarten, vnd besunder zu dem liecht Sechzig phunt wienner ze hilf der Mess, Also daz der vorgenant Hanns beym tor die egenanten weingarten in nucz vnd gewer haben sol vncz an seinen tod vnd soll mir vnd meinen nachchomen dienen alle Jar zwainzich phunt wienner phennig - vnd nach seinem tod sulln dieselben guter zu der genanten Mess vnd liecht gevallen - Also daz wir die vorgenanten Mess mit einem erwern priester, den wir nach des egenanten hannsen pey dem tor lebtagen oder nach seinem tod vnsers prelaten ze Newnburg rat vnd wissen darzu nemen sulln, das er oder ain ander die vorgenant Mess hab vnd verbes vnd die mitsambt dem tag sprech, das dannach ein ygleicher arbaiter an sein arbait wol gen mug, vnd die Mess soll man sprechen an Montag, des Mitichen, des Freitags vnd des Sampcztags - vnd sol auch der pharrer denselben priester in der Chost haben mit essen vnd mit trinken gerecht, als sich selber, vnd sol im geben alle Quotemmer ze lon zehen schilling wienner phennig, vnd sol im auch in allen pfefleichen sachen gehorsam sein - Des gib ich disen prief - versigelt mit meinem Insigel vnd mit der erwirdigen vnd weisen mann Thoman des Vaschzieher, der zeit Statrichter ze Newnburg Chlosterhalben, vnd Symon des Wysent aufm Anger Insigel. - Der geben ist - drewzehenhundert Jar, darnach in dem Newn vnd Newnczigisten Jar an dem Palm abent.

Source Fulltext: ZEIBIG, Klosterneuburg (=FRA II/28, Wien 1868) S. 98