IN nomine Sanctae et individuae Trinitatis. Karlomannus divina favente gratia Rex. Si aptas utilesque complacitationes inter Ecclesias Dei et nobiles quosque consenserimus, non solum inde res Ecclesiarum sublevari credimus, verum etiam praemia inde nobis aeterna providere liquido confidimus. Quapropter noverit industria omnium fidelium Sanctae Dei Ecclesiae nostrorum que praesentium et futurorum, qualiter quidam venerabilis Diaconus noster nomine Chunibertus ad Monasteria Principum nostrorum nobiscum complacitavit. Tradidit itaque praefatus Chunibertus ad Monasterium Chremisae, quod est constructum in honore Salvatoris, praeter agros, prata et sylvas hubam unam, quam emerat in loco, qui dicitur Linthard, quatenus ipsa huba cum duobus mancipijs et decem armentis, cum porcis viginti et ovibus totidem post finem vitae suae securiter ad jam memoratum Monasterium transeat ea siquidem ratione, ut illi per praeceptum nostrae auctoritatis usque in finem vitae suae in proprietatem donaremus, quidquid in nostrum beneficium de ipso Monasterio Chremisae in jam dicto loco, qui dicitur Linthard, habere videtur, id est hubea duae cum curte et aedificijs, cum mancipijs utriusque sexus, cum agris, sylvis, pratis, pascuis, aquis, vijs et invijs et cum omnibus, quae in eodem loco ad saepedictum Monasterium juste et legaliter pertinerent. Nos autem ejus petitiones iustas et utiles ex utraque parte cognoscentes dedimus illi cunctas praefatas res cum omnibus, quae ibi in beneficium prius habebat, quatenus ea omnia in proprietatem vitae suae tantum habeat atque possideat cum omnibus quaesitis et inquisitis earundem rerum pertinentijs, post finem vero vitae suae pleniter atque securiter cum praedicta complacitatione non solum sua traditio verum etiam ipsa nostra largitio ijs verbis, sicut praedictum est, ad praefatum Monasterium et locum Sanctum redeat. Et ut haec auctoritas nostrae complacitationis per futura tempora firmiter habeatur, manu propria nostra subtus eam firmavimus et annulo nostro sigillari jussimus. Signum Karlomanni invictissimi Regis. (Monogramma.) Madalwinus Notarius ad vicem Theotmari recognovi. Datum IV. Idus Febr. anno tertio regni Karlomanni serenissimi Regis in Wawaria, in Italia secundo, Indictione XI. Actum ad Oeting curte Regia in Dei nomine feliciter. Amen.

Source Fulltext: OÖUB 2 (Wien 1856) S. 23-24