IN nomine Sanctissimae et individuae Trinitatis. Arnulfus Divina favente gratia Serenissimus Rex. Si devotissimorum et venerabilium Clericorum diu noctuque in nostro anhelantium servitio curam gerimus et aliquid eis de temporali proprietate nostra donare studuerimus, praemia vitae aeternae inde nobis provenire liquido credimus. Quapropter omnium fidelium nostrorum, praesentium scilicet atque futurorum cognoscat praesentia, qualiter nos cuidam Venerabili et Religioso Capellano nostro Zazconi interventu Procerum fideliumque nostrorum nec non et ob assiduum et bonae fidelitatis suae servitium tales causas, sicut hactenus ad Welas habuit in beneficium, Omnibus diebus vitae concessimus in proprium, id est cum Ecclesijs et aedificijs, cum mansis et beneficiis, cum mancipiis universis utriusque sexus omnibusque decimationibus, cum terris et agris cultis et incultis, campis, pascuis, pratis, sylvis, aquis aquarumve decursibus, molendinis, piscationibus, quaesitis et inquisitis vel cum omnibus juste et legitime ad ipsam capellam pertinentibus nihil extra dimittentes sed totum ex integro de jure et dominatione nostra ei in jus et dominationem per hoc praesens auctoritatis nostrae praeceptum pleniter in Christi nomine confirmatum donamus, tradimus atque transfundimus ea scilicet ratione, ut ipse securiter ea omnia teneat atque possideat, quamdiu Deo opitulante vivit, et potestatem habeat ea omnia potestative tradere ad Monasterium, quod est Chremisa nominatum ad Sanctum Salvatorem pro remedio animae nostrae suaque aeterna remuneratione, ut post suum discessum illuc pleniter consistat ad usus fratrum ibidem Salvatori nostro die noctuque famulantium, quatenus illos fratres Dei omnipotentis misericordiam pro nobis jugiter orare delectet. Et ut hoc verius credalur et per futura tempora a cunctis fidelibus nostris diligentius conservetur, manu propria confirmavimus et subter hoc sigillo nostro assignari jussimus. Signum domini Arnulfi Invictissimi Regis. (Monogramma.) Albertus Cancellarius ad vicem Theotmuri Archicancelarij recognovi. Datum Idus Aprilis Anno Dominicae Incarnationis DCCCXXXVIII. Indictione VI. Anno primo domini Arnulfi gloriosissimi Regis. Actum civitate Regina In Christi nomine feliciter. Amen.

Source Fulltext: OÖUB 2 (Wien 1856) S. 32-33