Ich Jans von Ror vergich vnd tven chvnt allen, die diesen brief ansehent, di nv sind vnd chvmftig werdent, Daz ich minen gvten willen darzve han gegeben, daz heinrich von aih chvngvnten von tvmsteten elichen vnd ze einer chonen genomen hat, also, ob sie mit enander chint vnd erben gewinnen, daz daz erstgeboren chint, ez sei ein svn oder ein tohter, svnderlich vnd ledichleich nach dem vater daz gotshaus ze chremsmvnster angevalle vnd dez mit dem leib sei, als der vater ist, vnd daz wir dir andern chint ich vnd daz selb gotshavs, die sie fvrbaz mit enander gewinnent, gelich tail svllen, vnd darvber ze vrchvnd vnd ze ebiger staetigvng gib ich in disen brief mit meinem insigel bestaetiget vnd mit den zivgen, den div sach chvnt ist: Her Sigmar der chelner da ze chremsmvnster, her Dietmar der chapplan, Her Ott der pharrer von hall, Her Tristram der pharrer von chemnaten, Her heinrich von ahlaiten, ott von ahlaiten, her Herman von Egendorf, Her heinrich von Egendorf, albreht der rihter von hall, bernhart vnd Ott von ahlaitten vnd ander biderb lewt. Div sach ist geschehen vnd der brief gegeben in dem Tavsentistem vnd Zwaihvndertistem vnd zwaivndnevzigistem Jar nach Christ gebvit nach sant margareten tag.

Source Fulltext: OÖUB 4 (Wien 1867) S. 169-170, Nr. 184