Wir Abbte Friderich von Chremsmunster vnd weichart von Polnheim, Lantrichter ob der Ense Tvn chunt allen, deu disen brief ansehent, daz wir di sache, div zwissen dem Brobst von Ranshoven vnd Otten vnd hainrichen den zolnaren von halle vber Eribreht vber pfenning gehandelt was vor gaistlichem vnd weltlichem geriht, von peder tail willen also frivntlichen haben geschaiden, daz der Brobst den vor genanten zolnaren geit vor pfingesten funf pfunt pfenning, vnd si von allem reht, von aller chlag stent vmb alle sache gegen dem Brobst von Ranshoven vnd gegen sinen livten rnd dar v^eber haben wir dis brief gegeben, versigelt mit vnserm insigel. Daz ist geschehen, do von christs purt waren vergangen Tovsent iar, zwai hundert iar, driv vnd Nivnzik iar dez pfinketags nah dem Ahtern tak nah oster date welse, da sint pei gewesen her ortolf von Polnheim, her Chunrat von chapelle, her Gundacher von Polnheim, her Rudiger von Radek, chorheren von pazzov, her chunrat holceman, her Seibrant von Geltinge, her hainrich von Alharting, her Rudolf schiver, her hainrich von Ahleiten vnd ander piderbe livt pfaffen vnd laien.

Source Fulltext: OÖUB 4 (Wien 1867) S. 186, Nr. 201