Paschalis episcopus seruus seruorum dei dilecto filio Sigiboldo abbati uenerabili monasterii sancte Marie sanctique Kyliani, quod situm est in lambach ejusque fratribus regulariter substituendis in perpetuum. Desiderium, quod ad religionis propositum et animarum salutem pertinere monstratur, sine aliqua est dilatione complendum. Ea propter dilecti in domino filii uestris iustis postulationibus clementer annuimus et prefatum monasterium, in quo diuino mancipati estis obsequio, sub beati Petri et nostra protectione suscipimus et presentis scripti priuilegio communimus. Inprimis siquidem statuentes, ut ordo monasticus, qui secundum deum et beati Benedicti regulam in uestro monasterio noscitur institutum, perpetuis ibidem temporibus inuiolabiliter conseruetur. Preterea quascunque possessiones, quecunque bona ibidem monasterium in presentiarum iuste et canonice possidet aut in futurum concessione pontificum, largitione regum uel principum, oblatione fidelium seu aliis iustis modis deo propicio poterit adipisci, firma uobis uestrisque successoribus et illibata permaneant. Sane noualium uestrorum seu que propriis manibus aut sumptibus colitis siue de nutrimentis uestrorum animalium uel parrochiarum et capellarum nullus a uobis decimas presumat exigere. Crisma, oleum sanctum, consecrationes altarium siue basilicarum siue gratiam ordinum ab episcopo, in cuius diocesi estis, accipiatis, si quidem gratiam et comunionem apostolice sedis habuerit et si ea gratis ac sine prauitate uoluerit exhibere. Alioquin liceat uobis catholicum quem malueritis adire antistitem, ab eo consecrationum sacramenta suscipere, qui apostolice sedis fultus auctoritate, que postulantur, indulgeat. Sane sepulturam eiusdem loci omnino liberam esse decernimus, ut eorum, qui illic sepeliri deliuerauerint, deuotioni et extreme uoluntati, nisi forte excommunicati sint, nullus obsistat. Obeunte te nunc eius loci abbate uel tuorum quolibet successorum nullus ibi qualibet surreptionis astutia seu uiolentia preponatur, nisi quem fratres communi consensu uel fratrum pars consilii sanioris uel de suo vel de alieno collegio secundum dei timorem et beati Benedicti regulam elegerint. Decernimus ergo, ut nulli omnino hominum liceat prefatum monasterium perturbare aut eius possessiones auferre uel ablatas retinere, minuere seu aliquibus uexationibus fatigare, sed illibata omnia et integra conseruentur eorum, pro quorum gubernatione ac sustentatioue concessa sunt usibus omnimodis profutura salua sedis apostolice auctoritate et diocesani episcopi canonica iusticia. Si qua igitur ecclesiastica secularisve persona hanc nostre constitutionis paginam sciens contra eam temere uenire temptauerit secundo terciove comonita, si non satisfactione congrua emendauerit, potestatis honorisque sui dignitate careat reamque se diuino iudicio de perpetrata iniquitate cognoscat et a sanctissimo corpore et sanquine domini ac redemptoris nostri Jesu Christi aliena fiat atque in extremo examine districte ultioni subjaceat. Cunctis autem eidem loco sua iura seruantibus sit pax domini nostri Jesu Christi quatinus et hic fructum bone actionis percipiant et apud districtum iudicem premia eterne pacis inueniant. Amen. Scriptum per manum Rainarii scriniarii regionarii et notarii sacri palacii. Data laterani per manum Johannis sacrosancte romane ecclesie diaconi cardinalis ac bibliothecarii. VIII. kal. aprilis. indict. II. Incarnationis dominice anno M°. C°. VIIII°. Pontificatus autem domini Paschalis secundi pape Xmi.

Source Fulltext: OÖUB 4 (Wien 1867) S. 553-554, Nr. IV (Anhang)