Levpoldvs dei gratia dux austrie et styrie In perpetuum. Qvia perversitas malignorum et materia jvrgiorum oblivio factis hominum bene Gestis solet Plurimvm adversari, ea, que piis locis de fauare principum provenivnt ad commodum et profectum, debent non inmerito scriptvre remedio perhennari. Hinc est, quod nos ad noticiam singulorum cupimus pervenire, quod nos de consilio magnorum nostrorum cum ecclesia Lambacensi pro totis ivribus, que de fundatione sua in civitate vvelsa libere possidebat, convenimus sub hac forma pacem terre sperantes exinde multipliciter profuturam. Dedimus eidem ecclesie redditus viginti talentorum perpetuo possidendos et tam abbas quam fratres ipsius monasterij proprietatem et omnia ivra, que habere in civitate predicta non solum in theloneis sed et iudiciis noscebantur, nostris manibus concorditer obtulerunt a nobis et nostris heredibus sine contradictione qualibet possidenda. Qvia vero sepedicta ecclesia aduocatie libertatem per aliquantum temporis postea expetebat a nobis, nos eam postulantibus abbati et fratribus antedictis libero animo indulsimus tali modo, quod ipsi nobis nominatos viginti talentorum redditus redderent et plenarie resignarent. Quod jpsi in presentia nostrorum nobilium faciebant. Remisimus igitur monasterio memorato quamlibet pensionem, exactionem et alia quelibet seruitia, quocumque nomine censeantur, que nobis poterant vel possent ex aduocatia ipsius monasterii in Lambach in bonis, redditibus quibuscumque et hominibus provenire nil vtilitatis de hiis omnibus preter solum nomen aduocati nobis aut nostris heredibus reseruantes exceptis triginta talentis vsualis monete nostre camere singulis annis de cetero persoluendis hoc nichilominus addito et presenti pagina irrevocabiliter confirmato, quod hec eadem aduocatia per nos vel heredes nostros ad alienas manus numquam in perpetuum conferatur sed in nostris seu heredum nostrorum manibus irretractabiliter maneat eo modo, quo prediximus, duratura. Vt autem hoc presens concambium et nostra gratia liberalis nulla possit infirmitatis molestia deprauari, sub adnotatis testibus duximus facti seriem prelibati per appensionem nostri sigilli vere confirmationis gratia roborandam. Testes huius rej sunt hii: Hermannus comes de Ortenburch, Wilhelmus comes de hevnburch, Otto camerarius, Hartnidus de Ort, Herrandus de vvildonia, Perhtoldus dapifer de Emberberch, Hadmarus de Chunringe, Irnfridus de hintperch, Albero de Pollenheim, Ditricus de Puhel, Henricus de hage et Siboto frater suus, Ditricus pramhase, Eberhardus de Angesicz, Hermannus Rughalm, Ditmarus iudex de welsa, Leo civis et alii plures. Datum apud Welsam. Acta sunt hec anno domini M.CC.XXII. feliciter. Amen.

Source Fulltext: OÖUB 2 (Wien 1856) S. 639-640