C. In nomine sancte et indiuidue trinitatis Ego Ditricus de Puhel et uxor mea Adelheidis ministeriales ducis Austrie et Styrie labentis mundi huius et uite transitiuum ac subitaneum considerantes decursum, cum nullius successionis fungeremur herede, pro hereditate regni celestis ac nostrorum remedio parentum uerum et pro salute dominorum nostrorum uidelicet ducis Austrie et suorum successorum tradidimus potestatiua manu monasterio in Lambach predium nostrum in Puhel uidelicet curiam in Puhel et curtem adiacentem et quidquid in concambio recepimus in Puhel pro curte, quam eidem ecclesie tradidimus, et predium in hage et porz et utental et chazbach et uineam in alhoch cum suis attinentiis et curte. Hanc autem donationem ea fecimus ratione, ut in loco, ubi sepultura habetur pie memorie fratris mei Chunradi de Puhel, construatur de conmuni sumptu uidelicet domni abbatis et nostri capella in honore sancte et indiuidue trinitatis, ubi cottidie missa fiat et de reditibus illis sacerdoti illi, qui ibi diuina celebrabit cottidie, poculum uini et panis albi preter suam administretur prebenda. Preterea tradidimus eidem monasterio predium apud Euerdingen, quod libere et potestatiue possedimus, tali conditione, ut dies annua constituatur nobis et parentibus nostris eo die, quo ego et uxor mea decesserimus, et de reditibus illius predii fratribus administretur et pauperibus et uolumus, ne abbas in eodem predio aliquam sibi presumptionem usurpet preter reditus et steuram et ne aliqua occasione a loco lambacensi alienetur. Tradidimus etiam prefato monasterio omnes nostre proprietatis homines ad censum v denariorum exceptis his, qui sunt militaris conditionis. Volumus etiam, ut huius donationis nostre aduocatiam nemo sibi usurpet, quia ipse rex regum et dominus dominantium, cui hanc nostri iuris uotiue obtulimus donationem, nullo super se eget defensore. Sin autem diuina ordinatione a domino heredem acceperimus, uolumus, ut huic heredi totum predium predictum libere et potestatiue iure cedat proprietatis excepto predio in Alhoch scilicet uinea cum suis attinentiis et curte et ea curte apud wels, quam ab abbate susceptam tenemus, que sine omni contradictione monasterio in lambac iure debet cedere proprietatis. Uolumus etiam, ut si capella predicta nobis superstite constructa non fuerit, predium apud euerdingen ad medietatem sumptus in huius operis cedat consummationem. Siquis autem hanc nostram traditionem infringere attemptauerit, cum datthan et abyron perpetue subiaceat dampnationi. Hec ut in eternum rata permaneant, testimonio subscriptorum roborantur. Heinricus et Siboto frater eius de hage, Ditricvs pramhas, Eberhardus Ansiez, Ditmarus Gugrel, Chunradus lau, Vlricus schonpuhel, Ditricus, Chunradus phaphindorf fratres, Ulricus Chrotindorf, Marchwardus Puhel, Heinricus, Otto Camerarius, Hartungus, Chunradus de Swaige fratres, Walchun, Reinolt, Herrandus Hornarn, Otto Pellifex, Rudegerus, Fridericus de Haunpretign fratres, Eberhardus preco, Arnoldus, Chunradus preco, Alrammus, Heinricus preco, Gundrammus preco, Ditricus nemorarius, Ulricus schober plebanus de otespach, Leutoldus de afnan, Dietmarus Posach, Hermannus Rughalm, Snello, Dietmarus oven, Reingerus Gatring.

Source Fulltext: OÖUB 2 (Wien 1856) S. 640-642