C. In nomine sancte et indiuidue trinitatis Gebehardus dei gratia Patauiensis episcopus In perpetuum. Quia non solum memoria sed et uita hominum breuis esse dinoscitur et inconstans, pium et salutiferum credimus in domino nobis esse, ut siquam pietatis gratiam ecclesiis seu religiosis personis curauerimus exhibere, hanc et ipsis, ut stabilis permaneat, scripti nostri munimine confirmemus. Quocirca elucesere cupimus presentibus et futuris, quoniam, cum a uenerabilj fratre nostro Ottone abbate de Lambach exigeremus priuilegium super decimationibus noualium in Grvenach, quas idem abbas ad monasterium suum asseruit pertinere, et ille super hiis non priuilegium sed uiuj testimonij probationem offerret, nos ad recipiendam audiendamque probationem suam huiusmodj diem constituimus, ut expediebat eidem. Ad quem dum esset peruentum, ipse abbas in presentia nostri conparens per testes (fide) dignos idoneosque probauit, quod uidelicet felicis recordationis Theobaldus pontifex predecessor noster predictam decimationem ipsorum noualium in Grvenach, cum adhuc inculta fuerant, pro parte maiori dicto monasterio Lambach primo tradidit libere et donauit nulla donatione seu traditione de ipsis decimationibus facta prius ullj ecclesie ulliue persone, presertim cum et ille locus quasi solitudo tunc fuerit nec aliquarum terminis ecclesiarum asscriptus, et eas quidem XX. annis uel amplius prefatum monasterium plena pace possedit, donec illarum possessio de uiolentia quorundam fuit ei sublata. Testes quoque, per quos sunt ista probata, omnibus hiis factis presentialiter affuerunt. Nos igitur considerata et intellecta probatione sua tam legitima tam idonea super illis, utpote qui unicuique ecclesie in conservatione iuris suj adesse cupimus, ut tenemur, huiusmodj donationem decimarum in ipsis noualibus Grvenach factam tam rationabiliter tamque iuste innouare curamus, easdem decimas memorato monasterio Lambach pleno iure donantes et donatas hujus priuilegii pagina sigillj nostri impressione munita potestatiue, ut expedit, confirmantes omnemque anathematizantes hominem, qui hanc donationem nostram seu confirmationem infringere uel ei presumpserit in aliquo contraire. Omnibus igitur ipsam seruantibus sit pax et salus in domino gaudia felicitatis eterne feliciter adepturis. Hujus rej testes sunt Vlricus Cobertel archidiaconus, Chunradus de sancto Valentino, Albertus de Possemvnster, Siboto canonicj Patauiensis, Vlricus scobrius canonicus Frisingensis, heinricus plebanus de Taufchirchen, Otto sacerdos de sancta Maria, Hademarus pincerna de Wesen, Pilgrimus dapifer de Tanneberc, Livtoldus de Sauerstetin, heinricus de Merswanch, Albertus de Pernsteine, Chunradus spisaere et sororius eius Chunradus, Fridericus de Raenna, Eberhardus de Vfhoven, hezelo de Rivte, Vlricus de Pvhele, Meinhardus de Alhartingen et filius suus heinricus, Wernhardus de Prambach, Wernhardus de hage et alij quam plures. Actum Patauie in Stupa nostra II. Kalendas Martij, Anno dominj M.CC.XX.IIII., Indictione XII., Pontificatus nostri anno II.

Source Fulltext: OÖUB 2 (Wien 1856) S. 646-647