Ich Rv^eger von Storchenwerch verieh an disem prief allen den, di in sehent oder horent lesen, daz ich mit gu^etlichem willen meines prv^eder Jansen han gesaczt Vlreichen von Prvnnhaeym di nidern fo^erst, di mir von meinem prv^eder Jansen stent, fvr zwelif phvnt alter phenning wienner mvnnzz mit beschaidner red also, swenn ich im di vorgenanten phenning gib , ee de dienst abgenomen wert, so sint di fo^erst ledig, an welicher zeit daz ist in dem iar. Daz im di red von mir stet beleib vnd vnverchert, dar vber gib ich im disen prief versigelten mit meinem insigel vnd meines prv^eder insigel Jansen. Des sint gezevg Her Ditmar von Aistershaim, Ditmar vnd Haeinrich sein vetern, herr wernhart von Sant Jorgen, Chvnrat vnd Vlreich sein vetern, Helmhart von Tvtschenperig, Ortolf vnd Ott von Obernhaim, Helmhart von prvnnhaim, Vlreich von Anhang, Helmhart vnd Vlreich sein svn, Ott von Havzenpach.||
Der prief ist gegeben, do von christes gebvrt waren Tavsent Jar, Drev hvndert Jar vnd in dem Ochten Jar an sant Agnesentag.

Source Fulltext: OÖUB 4 (Wien 1867) S. 539, Nr. 579