Ich Christan von wolfsekk Tuen chunt allen den, di disen prief Sehent oder lesen ho^erent, daz ich mit wol bedahtem můet vnd mit guetem willen han den halben hof datz Chirichdorf Pei Gaspoltzhouen gegeben dem erbern Goteshaůs ze Lambach vnd ist daz geschehen mit meiner hausvrowen vran Lucein vnd mit vnser paider vrevnt wille vnd wart zv^e den zeiten, du wir daz wol getuen mahten. Ich han auch dem e genantem Goteshaus an dem vorgenanten halbem hof nutze vnd gwer auf gegeben pei meinen lebmdigen Zeiten auf di rede, daz dem oft genantem Goteshaus dhain chriek iht enwert an dem vor genantem halben hof. Ich offen ouch daz, daz man mich schol bestatten datz dem Chlo^ester ze Lambach, da ich mein saelgerset han hin gegeben, swen daz ist, daz Got vber mich gepevt. Daz daz staet vnd vnverchert beleib, dar vber gib ich disen prief bestaet mit meinem ynsigel vnd vlreich dez Perigawer vnd Jansens von Lo^esenhaim mit ir paider ynsigel zv ainer ewigen bestaetigung dem vor genantem Goteshaus vnd di erber zevg, di hie verschriben sint: her Eberhart von walse vnd sein prueder her Hainrich, Her alber von polnhaim vnd sein prueder Her Reinprecht, Teim der Egenperiger, Chvnrat der holtzhanner, Hainrich der viehter, alber der gusner vnd ander erber Lav^et genueg. Der prief ist geben nach Christes gepurt vber drevzehenhundert iar, dar nach in dem drevzehten iar an sant philips tag.

Source Fulltext: OÖUB 5 (Wien 1868) S. 108-109, Nr. 106