†. Wir Sigmar votes (sic) gnaden abt ze Lambach etc. daz wir haben verlihen den hof aůf dem Swensleinsperch Ortolfen von Choeving vnd seiner haůsvrown vron ... ze Leibgedinge mit sotaner bescheidener red, daz div vor genanten zwai mensche ||
vnserm Spital ze lambach alle jar an Sand Michelstag fvmph schylling newer wienner fphenning vnd sechtzig fphenning an dem perichtag zu der paw°steur vnd dreisike fphenninge an Sand Jorigen tag ze der voitstewr an allen krieg ze den vorgenanten taegen dienen vnd geben schullen. Wir offen auch daz, Swanne der ê genant ortolf vnd sein haůsvrow° ... siv paidew steribent, so sol der vorgenant hof vnserm goteshaůs an alle widerred vnd an alle ansprach ir paider chinde vnd vrevnt ledich sein also, daz von ir paider guet auf dem hof gerichet bleiben sol, daz zwair phvnt wert sei. Daz di red vnuerchert bleib etc. Disew hantfest, div geschriben ist vber den ê genanten hof, ist gemerchet mit einem chrautz, als hie an der abgeschriffet stet geschriben an dem anfanche diser hantfest.

Source Fulltext: OÖUB 5 (Wien 1868) S. 139-140, Nr. 140