Ich Ha^ertweich der Strachner, ich Chu^onrat der Hatzmuzel, ich Otto von Chamer, ich Alber von Po^ertzhaim, ich Fridreich von Perchaim, ich Ott von Chustelwanch, ich Dietreich der Oven, wi^er verichen offenbar an disem gegenburtigen prief allen den di in sehent, lesent oder ho^erent, daz unser ersamer herr her Greiff, abbt ze Lambach mit Leutolden seinem amman des sunntages vor sand Veits tag einen reht tag habent genomen mit ir paider guetlicher willn au^of ein unverzogens reht hintz Lambach, und sind da gegen ein ander gestanden mit vorsprechen vor Johansen von Tann, der der sach richter ist gewesen von hern Eberharts des jung von Walsse gescha^efft der lantrichter ze den zeiten ob der Ens was, und hat der vorgenant herr her Greiff abbt des e genanten gotshau^os Leutolden anbehabt mit vrag und mit uortail und mit rechtem reht di Voersthueb datz Glaeuzing und dar zue allez daz, daz er ze den zeiten von dem gotshauos hat gehabt, swo daz gelegen ist, iz sei reht lehen oder erb, und ist daz mit rechtem reht ertailt, daz sein hantfest, di er ze den zeiten von dem e genanten gotshaus hat gehabt, daz di to^ed und ab schullen sein und fu^erbaz dem gotshau^os an schaden schullen sein und Leutolden an vrum, und pei dem reht sind erwer la^eut von rittern und chnechten genueg gewesen und daz wi^er des rechtes und der sach fu^erbaz urchund und gezeug sein, des geben wi^er dem e benanten abbt und der samung des offt genanten gotshau^os disen gegenburtigen prief versigelten mit unsern anhangunden insigeln. Der prief ist gegeben ze Lambach, du von Christes gepu^erd waren ergangen dreuzehundest jar dar nach in dem zwai und zwainzigistem jar des sunntages vor sand Veitstag.

Source Fulltext: StiAL, Kopialbücher, HS 16, P. Augustin Rabensteiner OSB: Documenta monasterii Lambacensis Bd. I, ab anno 992-1415, S. 190f, Nr. 173