Ich Margret, ich Elspet, ich Chu^enigunt, ich Agnes und ich Kathrei Ru^egers toechter von Chu^echendorf wi^er veriehen und tuen chund allen den, di^e disen gegenbu^ertigen prief sechent, sechent lesent oder hoerent di^e nu lebent oder noch chu^efting werent, daz uns unser gnaediger her der ersam apt Greyff ze Lambach mit samt der seiner sammung willen und gunst verlihen hat den hof ze Enzensperg ze rechtem lechen mit allem daz dar zu^e gehoert ze holtz oder ze veld versuecht oder unversuecht also beschaidenleichen geschaech, daz von gotes gepot daz unser aineu oder zwo sturben so schol der zwaier oder ainer tail gevallen an ander unser geswistret di^e dan noch lebent, sturben wi^er aver all fu^emf ab, so wu^ert der gantz hof dem gotshaus ledich an alleu ansprach und allen chrieg; waer awer, daz, daz wi^er den vorgenanten hof tailtent mit fuerzicht und mit aller staet, swelich dann under uns sturib, der tail wu^ert dem gotshaus ledich an allen chrieg, und daez daz staet und unverchert dem gotshaus und uns fuerbaz beleib, dar uber geben wi^er in disen gegenbu^ertigen prief versigelten mit unsers vreunts insigel hern Dietmars von Lerbu^echel und mit dez weisen mans insigel Dietmars von Aystershaim der zten zeeiten haup^tman waz ze Ebelsperg und seind wi^er nicht aigens insigels haben, habent si durich unsers gepets willen und uns ze fuedrung und zu^e einer bestaetigung paidenthalben i^er anhangundeu insigel gelichen, und sind pei der sach und pei der wandlung gebesen die ersamen zeug: her Wernhart von sand Goerigen, her Helmhart, her U^elreich und Wernhart di^e Anhanger, Hainreich der Viechter, U^elreich der Prunnhaimer, Helmhart der Tu^echenperiger und ander pidiber laeut genueg. Der prief ist gegeben ze Lambach du^e von Christes gepuerd worden ergangen tausent jar dreu hundert jar dar nach indem dreu und zwainzigisten jar an sand Veyts tag.

Source Fulltext: StiAL, Kopialbücher, HS 16, P. Augustin Rabensteiner OSB: Documenta monasterii Lambacensis Bd. I, ab anno 992-1415, S. 194f, Nr. 176