Wier Greyf von gotes gnaden Abbt ze Lambach vnd auch di gantzz Sammung dez selben Chlosters veriehen vnd tuen chunt mit disen prief allen den, di in sehent lesent oder ho^erent, Daz wier miet guetem wiln verlihen haben den anger hof ze Neuhaim vnd allez daz, daz dar zv° gehoert, versuecht oder vnuersuecht, Chunra^eten dez Pierssen eningchel vnd seiner Hausurowen vran atiligen vnd allen ier Eriben ze rechtem Erib recht also beschaidenleich, daz sie vns alle jar an sand Michels tag vier Schaff Chornes dez pezzern, daz auf dem hof wiert, in vnser Chamer zv der herren gwant dienen schu^ellen vnd an sand Gorigen tag fumfzehen pfenning ze vogt stewer vnd anders nicht, vnd swenn vns die ê gnanten den vor gnanten dienst versaezzen von armuet oder swie daz chaem, so sind si vns der wandel gepunden ze drin vierzehen tagen immer sechtzig pfenning, vnd verrichtent si sich mit vns nicht innrr jars vriest vm den dienst vnd vm di wandel, so sind si vnd auch ier Eriben geuallen von allem irem recht; vnd daz daz staet vnd vntzebrochen allenthalben fuerwaz beleib, dar vber geben wier in disen prief versigelten mit vnsern Paiden jnsigeln vnd sind dez gezeug Her Chunrat der Slegel, vlreich der fu^elich voyt ze wels, Hainreich der Chropf, vlreich Roentel, jacob ze wels, andre da selben, Chunrat der Snoed vnd ander Erbaer laeut. Der prief ist gegeben ze Lambach, Du man zalt von Christes gepu^erd Tausent jar, drev hundert jar, Dar nach in dem sechs vnd zwainzigistem jar an sand Gregorij tag.

Source Fulltext: OÖUB 5 (Wien 1868) S. 448, Nr. 448