Ich Haertnit der Trucksaecz und ich Leutolt hern Haertnicz pruder sun veriehen offenbar an disem prief und tun chunt allen den, di in sechent, horent oder lesen, daz wir mit vereintem gutlichem willen und mit unserr fruint ratt alles daz geslaecht, daz chomen ist von froun Erntrouten der Peuntnaerinne und von freun Maczen der Steinwurczerinne und von Chunraten dem Peuntnaer daz uns mit zinse angehort von dem erwerrn goczhaus ze Lambach haben verschaft und gegeben dem selben goczhaus durch unserr sele willen also bescheidenlich, daz man unserr sel da gedenchen sol und alle jar jaerlich unser vigili da begen sol und enphelichen wir daz hincz der trwen di dez Goczhaus waltich und verweser und schaffer sint. Daz daz also stat und unzebrochen beleib, dar uber gich ich Hartnit der Truchsaecz in disen offen prief ze urchunde der warheit und ich Leutolt hern Haertnicz pruder sun verbint mich mit meinen trewen under daz insigel alles daz staet ze haben, daz an dem prief geschriben stet, wand ich ze den zeiten aigens insigel nicht enhet. Der prief ist gegeben ze Everding, do man zalt von Christes geburt dreuczehen hundert jar, da nach in dem sechs und zweinzigisten jar an unser frowen tag ze des liecht mess.

Source Fulltext: StiAL, Kopialbücher, HS 16, P. Augustin Rabensteiner OSB: Documenta monasterii Lambacensis Bd. I, ab anno 992-1415, S. 203, Nr. 184