Ich Hainreich der Pachleiter verich offenleich und tuen chund allen den, di disen prief sehent oder lesen horent, daz mein gnaediger herr apt Greyff ze Lambach mit sampt der sammung da selben verlihen hat mir und meiner hausvrowen Sophein und allen meinen erben daz guet ze Haekking enhalb dez Haustukks ze rechtem erib recht, daz wir alle jar davon dienen schullen dreizig pfenning alter wienner und anders nicht. Swenn aver ich oder mein e gnanteu hausvrow oder mein eriben den vor gnanten dienst versazzen alle jar an unser vrowen tag zter dien zeit dem e gnanten gotzhaus, so hat sich als unser recht vervallen ledichleich und an allen chrieg. Und daez daz staet und unzebrochen beleib, dar uber gib ich disen gegen prief zu einem urchund versigelten mit meinem insigel und mit hern Helmharts insigel von Anhang und sind gezeug her Wernhart von sand Gorigen, Helmhart der Tutschenperiger, Ulreich der Prunnhaimer, Hainrich der Viechter, Alber der Gusner, Hadmar der Hiert, Eberhart von Widemspach und ander pidib laeut. Der prief ist gegeben ze Lambach du man zalt von Christes gepurd tausent jar dreu hundert iar und dar nach in dem siben und zwainzigistem jar an sand Gregorii tag.

Source Fulltext: StiAL, Kopialbücher, HS 16, P. Augustin Rabensteiner OSB: Documenta monasterii Lambacensis Bd. I, ab anno 992-1415, S. 209f, Nr. 190