Ich Gebhart der Pluem mit meiner hausvrowen vran Elspeten wiln und wart verich und tuen chund allen den di disen prief sehent oder lesen horent, daz ich ze einem satzz han gehapt von dem gotshaus ze Lambach fuer vier und fumftzig pfunt Wienner pfenning den hof ze Selling und den zehent dar auff und di zwen hof datz Zwischel und di mul da selben und di lehen di dar zu gehorent. Und han ich und mein hausvrow uns zu einem selgraet dem goczhaus dene gnanten satzz ledig lazzen. Und hat uns mein gnaediger herr apt Greyff ze Lambach mit der samung da selben wiln und wart di guet verlihen zu einem leib geding, daz wir di schullen inn haben untz an unser peder tod, und swenn ich und mein hausvrow nimer sein von Gotes gepot, so sind di guet dem vor gnanten gotzhaus von uns ledig ledichleich an ansprach und an allen chrieg. Sich habent auch di e gnanten herren dez verpunten, daz si alle jar dez nachsten tags nach sand Andres unsern jar tag mit mezz und mit vigili und mit almuezen wellent begen, und dar um swerr herr und pfleger ze Lambach ist, der schol den herren in di gmain von den e gnanten gueten geben alle jar an sand Andres tag ein pfunt pfenning an alle wider red und an allen chrieg. Und daz daz staet und unzebrochen beleib, dar gib ich in disen prief uber zu einem urchund versigelten mit meinem insigel und mit hern Wernhantz dez pfarrer insigel ze Prukk. Und sind dez gezeug her Wernhart von sand Gorigen, her Helmhart und her Ulreich von Anhang, Hainreich der Viechter, Alber des Gusner, Helmhart des Tutschenperiger, Hadmar der Hiert und ander erber laeut. Der prief ist gegeben du man zalt von Christes gepurd tausent jar dreu hundert jar dar nach in dem siben und zwainzigestem jar an dem Palmtag.

Source Fulltext: StiAL, Kopialbücher, HS 16, P. Augustin Rabensteiner OSB: Documenta monasterii Lambacensis Bd. I, ab anno 992-1415, S. 210-212, Nr. 191