Ich Gerung von Asenhaim vergih vnd tun chunt allen den, die den priff sehent oder lesen ho^erent, daz mir der ersam herre Abbt Greyff ze Lambach mit der samung daselben gu^etlichem willen verlihen hat vnd meiner hausfraw Offney vnd vnser paide chinden die hub ze Hag vnder Storchenberg ze rechtem erbrecht vnd was dar zv gehort versucht vnd vnuersucht vnd sullen wir die hub innehaben drew jar an dinst mit solicher beschaidenhait, wann die drew jar auschument, so schullen wir dem egenanten gotshaus dauon geben alle jar an sand Michelstag ein halbs phunt phenning alter wienner vnd an dem perichtag sechczig phenning vnd wann wir die phenning ze den tagen ze hant nicht geben, so sullen wandel dar auff gen ze drin virczehen tagen sechs schilling phenning vnd richten wir uns nicht vmb den dinst vnd auch vmb die wandel, so schol sich alles das recht veruallen haben das wir dann gehabt haben an der vorgnanten hueb vnd daz das stät vnd vnzebrochen beleib, darüber gib ich in den prieff ze ainen vrchund versigelten mit meines herrn insigel von Walsse herrn Eberkarts vnd mit meinen insigel. Der brieff ist gegeben ze Lambach da man zalt von Christs gepurt drewczehenhundert jar dar nach in dem ain vnd dreissigstem iar an sand Vrbanstag.

Source Fulltext: OÖUB 6 (Wien 1872) S. 637f., Nr. 80 (Anhang)