Ich Friderich Piber herrn Duringes sůn des Piber, vergich offenlich mit dem brief allen den, die in ansechent horent oder lesent, die nun sind oder hernach kunftig werden, das ich mit wolbedachtem mut vnd mit gema^einem rat aller meiner eriben willen vnd wort aufgegeben hab recht vnd redlichen Jacobm dem Altrichters aidem purger ze Wells dy mannschaft, die ich hab gehabt auf der Hueb ze Herising, die er von mir ze rechtem lehen hat gehabt vnd die mein freys aigen ist gewesen also beschaidenlichen, das ich die vorgenanten manschaft hab gelait guetlich vnd gern hinter das erber kloster hintz Lambach also das man alle jar durch meiner sel hail willen dem kloster dauon dienen schol ze ainem ewigen sellgret fu^enff wienner phenning an sand Jo^erigen tag. Ich schol auch der hueb meines freyn aigens des egenanten klosters gwern sein wo in des not vnd durft geschiecht ze hof oder ze taiding als des landes recht vnd gewonhait ist ob der Enns. Es ist auch die wandlung geschehen bey des erbern herrn abbt Johannsens zeitten. Das das also stet beleib, daruber gib ich disen offen brief ze einem sichtigen vrkundt versigelt mit meinem anhangunden insigl. Der brief ist geben, do man zalt nach Kristes gepurd drevvtzehen hundert jar, darnach in dem zway vnd dreissigistem jar des nachsten phintztags vor sannd Niclastag des heyligen herren.

Source Fulltext: OÖUB 6 (Wien 1872) S. 639f., Nr. 83 (Anhang)