Ich Stephan der Egenperiger vergich offenbar an disem Prief Daz ich dem Erbern Goteshaws ze Lambach jerichlich dienen schol an vnser vrawen tag ze der dienzeit sechs pfennig newer wienner muntz von dem akcher, der da leit bay Pirichech vor dem vorstte, wand der akcher mein Erib ist von dem vorgenanten Goteshaws. Vnd wann ich oder mein Erben den vorgenanten dienst ze dem rechtem tag nicht engeben, so schulle wandel dar auf valle als nach Eribrecht geho^ert. Wer aber daz man den dienst mit dem wandel dar nach in vierzechentagen nicht engebe, so schol der selb akcher dem egenanten Goteshaus ledich sein an alle chrieg von mir vnd von allen meinen Freunden. Vnd daz div red stet gantz vnd vnzebrochen beleib Dar vber gibe ich disem Gotshaws disen Prief versigelten mit meinem anhangunden jnsigel. Vnd ist daz geschehen nach Christ pu^ert vber Dreutzechenchundert jar dar nach in dem drev vnd Viertzikisten jar des Nachsten Eritages nach dem Ostertag.

Source Fulltext: OÖUB 6 (Wien 1872) S. 646, Nr. 90 (Anhang)