Ich Chunrat der mayr von Gneussendorf vergich offenbar mit disem Prief vmb den Hof, den ich ze driu jaren bestanden han von hern Petern Hofmaister in Lambecher Hof vmb fumf Mutt traides, drey Chorens vnd zwen habern, deu ich antwurten schol in den vor gnanten Hof alle iar an sand Gylgen tag vnd zwai fueder stro vnd wann di drev jar ein ent habent, so schol ich den Hof ligen lazzen als ich den funden han mit zwelf jeuchen gesaeten. Ist auch ob ich den Hof ze veld vnd ze dorff an dem pawe icht enzug vnd nicht recht mit füer vnd ich dez mit einer worhait ermonet vnd funden wüerd, so sind alle meine recht ab, mir schulln auch alle iar an dem vor gnanten dienst zechn metzen ab gen, Waer auch daz ich dez vor gnanten dienstes zv dem egnanten tag nicht gaeb, so schulln Ekkel mein prueder vnd Ott der Amman mein swecher vnd vnd (sic) Ott der Has alle drei laisten gen Chrems in ein erber gasthaus da nicht auz chomen vntz daz der e gnant dienst gar vnd gantz gevall, dor vmb si fur mich mit iren trewen verhaizzen habnt vnd für allez daz hie verschrieben ist vnverschaidenleich von ainem auf den andern vnd dez allez zv einer tzeug gebnt si mit samt mier den Prief dem Gotshaus ze Lambach versigelten mit der erbern mann jnsigeln her Vlreichs dez Chremser Hofmaister in Agmvnder Hof vnd hern Stephans Hofmaister in Povmburger Hof di zeit ze Chrems, di auch der sache taidinger gewesen sind vnd zeug mit iren insigeln. Vnd ist der prief gegeben an sand Mertentag nach dreutzechn hundert jaren von Christi gepürd in dem drev vnd Viertzkistm jar.

Source Fulltext: OÖUB 6 (Wien 1872) S. 647, Nr. 91 (Anhang)