Wir Chu^enrat von Gotes gnaden Abpt ze Lambach vnd der gantz Convent des selben Chlosters Wir veriechen offenbar mit disem Prief, Daz wir mit Wolbedachtem mv^et vnd mit veraindem Rat haben verlichen Daz lechen ze Strebenperig ze ainem Rechten Erib mit allen den nvtzen, di durch Recht dar zu^e geho^erend ze holtz, ze veld, versuecht vnd vnuersuecht, Hainreichen von Strebenperig vnd seiner Hausvrowen Margreden vnd Phylippen von Strebenperig vnd seiner Hausvrowen Elspethen vnd allen ieren Chinden, div di viere mit ainander habend oder noch gebinnent, vnd der selben Chind nochchunft Sv^enen vnd To^echtern, wie di genant sind also beschaidenlich, Daz man vnserm Chloster jerichlich da von dienen schol ain Halb pfunt Wienner pfenning an Sand Michahels Tag vnd Sechtzig pfenning ze Powstewer vnd zwaintzig pfenning ze Voitstewer vnd vier huener vnd anders nicht. Daz in daz stet, gantz vnd vnzebrochen beleib, Dar vber geben wir in disen Prief versigelten mit vnsern Anhangunden jnsigeln. Vnd ist daz geschehen, do von Christs pu^ert ergangen warn Tausent jar, drevhundert jar, Dar nach in dem fumf vnd viertzikisten jar an des Edlen Herren Tag Sand Andres Tag.

Source Fulltext: OÖUB 6 (Wien 1872) S. 530f., Nr. 525