Wir Vlreich von Gotes gnaden abbt ze Lambach veriehen offenlich mit disem brif, das fu^er vns komen sind Hainrich vnd Alram vnd Bernhart, Vlrichs su^en des Mairs von Achlewtten vnd Alblein von Sigolfing vnd sein hausfraw Elsbeten vnd ir bruder Ortolf, vnd habent mit aller irer erben gu^etlichen willen vnd wort das lechen zu Vnreting gesetzt ze ainem rechten satz mit herren handt vnd mit aller der stet, die ze recht daruber gehorendt ze holtz, ze veld, versucht vnd vnuersucht, Philippen vnd seiner hausfrawn Kunigunden vnd ir baider erben vmb xvj. phundt Wienner den. denselben satz wir in bestaetigt haben mit aller staet vnd vrkund disen gegenbu^ertigen brifs, wannd das lechen von vnserm gotshaus ist, also das man vns ia^erleichen dauon dienen sol L newer Wienner munss an vnnsern frawntag der dienzeit vnd x dl. ze weinfu^er vnd xv dl. ze pawstewr vnd x. voit dl. vnd vj huener vnd anders nicht. Datum anno Domini M°. ccc°. xLviiij. Invocauit.

Source Fulltext: OÖUB 7 (Wien 1876) S. 96, Nr. 98