Ich Eberhart von Pollnhaym, Ich Vlreich von Anhang, Ich Alber der Partshaymer, Ich Dytrich der Schyuer, Ich Vlrich der Georger, Ich Chunrad der Etzlinger ze den zeiten phleger des lantgerichts ob der Ens vnd ich Jacob der Stracher vnd ich Chunrad der Salmansleiter vnd ich Vlrich der Wupel wir veriechen offenbar an disem gegenbu^ertigen prief, daz der wierdig gaistleich herre abpt Vlrich ze Lambach ainen tag het gegeben auf ain rechtez recht den erbern leuten Gotfriden dem Chempater vnd seinen prvedern nach i^er williger pet vmb die Chempnatow^e, da si nach chriegten, si wer ir erib vnd div geho^ert zu des gotshauses vo^erst vnd hiet da gen i^er manung dar vmbe geho^eret also herren vnd rittern vnd chnechtt ertailt hieten vnd an der manung ist in ab gegangen vnd hat der abpt div vorgenande Chempnatow^e mit ainem recht behabt vnd ist im ertailt von vns vnd von manigem erben manne, daz daz gotzhaus div ow^e fuerbaz vor in vnd vor i^eren erbn an alle chrieg hahn schol, vnd ist auch dem abpt vnd dem gotzhaus des hochgeporn fu^ersten hertzog Alber hertzog in Osterrich in Steyr vnd in Kernden schierm dar vber ertailt, vnd des edeln herren hern Eberhart von Waltse hauptman ob der Ens vnd landtrichter. Vnd dar vber geben wir dem abpt vnd dem gotzhaus den prief zu ainer bezeugnusse vnd gedechtnusse diser sache, wand wir da bey gewesen sein versigelten mit vnsern anhangunden jnsigeln. Actum et datum anno domini M°. CCC. XLVIIII° in octava sancti Martini.

Source Fulltext: OÖUB 7 (Wien 1876) S. 153, Nr. 154