Ich Fridel Hod vnd ich Margareth sein hausvrowe wir veriechen offenbar mit dem gegenbürtigen brief, daz wir mit wolbedachtem muet vnd mit aller vnser erben guetleichen willen vnd auch wart vnser havs an dem Stadel mit allen den nutzen di durch recht dar zu gehörend versucht vnd vnversucht, gesetzet haben ze ainen rechten satze mit herren hant vnd mit alle der steet di ze recht dar vber gehöret, dem erbern mann Christane ze den zeiten schreyber an dem Stadel vnd seiner hausvrowen vron Kathreyn vnd ir bayder erben vmb acht pfunt alter wienner pfenninge jerichlichen ze losen an allez gever an sand Giligen tage vor acht tage oder hin nach acht tage mit solicher beschaidenhait, daz wir oder vnser erben dem vorgenanden Christane oder seinen erben jerichleichen da von dienen sullen ain halb phunt wienner pfenninge ze weinachten vnd ain halb phunt wienner pfenninge an sand Georgen tage. Wer aber, daz wir den selben dienst versetzzen von wie getanen sachen daz geschiecht vnd in nicht geben zu den tegen di vorgeschriben stent, so schollen wir in daz vorgenand haus ravmen an allen chriege, vnd schullen si dann daz selb haus mit allen nutzen di dar zu gehörend vmb hofzins lazzen vmb minner oder vmb mer wem si wellen an allez widerreden vnser vnd aller vnser erben. Wir offen auch wenn si den satz nicht lenger wellen noch mügen haben wem si dann daz selben haus setzent mit dem gegenbürtigen prief, der selb schol alle div recht vnd gewer des vorgenanden satzes vnd des haus haben di vorgeschriben stent. Vnd ze ainer bezzern sicherhait vergich ich Jensel Hod vnd ich Nycol Hod vnd ich Albert Hod des obgenanden Fridleins prueder, daz wir mit vnsern trewn verhaizzen alle div wandlunge vmb den vorgenanden satz vnd alle div gelub div vorbeschriben sind, stet ze haben an allen chrieg, wand di taidinge vnd div wandlunge mit vnserm guetleichen willen vnd wart geschehen sind. Daz bestetige wir in mit des wol ersamen herren abpt Vlreichs ze den zeiten herre vnd phleger des erbern gotshaus ze Lambach anhangunden insigel. Datum Lambaci anno domini millesimo trecentesimo quinquagesimo quarto Johannis Baptiste.

Source Fulltext: OÖUB 7 (Wien 1876) S. 366f., Nr. 356