Ich Lienhart der Vreinperger vnd mein hausvrav vrav Elzpeth Rudolfs des Hohenvelder tauchter vnd vnser paider erben wir veriehen offenleich an disen prief, daz wir verchauft haben ain gut gelegen ze Hardarn in Swanser pharr, daz in vnser gewalt ist chomen von Otten dem Viechter dem Got genad mit allen nutzen vnd rechten di dar zu gehörent Ruegern dem Pausswekken vnd seinn erben auz vnserm nutz vnd auz vnserr gwer in ir nutz vnd in ir gwer vmb ein gelt dez wir schon gericht vnd gewert sein also peschaidenleich, daz ich mich vorgenanter Lienhart der Vreinperger vnd egenantev Elzbeth sein hausvrav vnd vnser payder erben allez dez rechtens vnd aller der nutz verzeichen di wir von dem obgenanten gut scholten haben. Vnd daz daz allez stet vnd vnzeprochen peleib gib ich in disen prief versigelten mit meinn insigel vnd mit Otten des Hohenvelder insigel, der auch diser sach gezeug ist im vnd sein erben an schaden. Datum anno domini millesimo trecentesimo Lix in crastino sancti Georii martiris.

Source Fulltext: OÖUB 7 (Wien 1876) S. 644, Nr. 633