Ich Hainreich von Praitnow vnd ich Kathrey sein tochter vnd ich Marchard sein aydem wir veriechen offenbar, daz wir vmb allen den chriege vnd vmb alle div ansprach di wir vnd alle vnser erben haben gehabt hintz dem wol erbern gotzhaus ze Lambach vnd hintz Hainrichen dem Spaener chellner daselben vnd hintz seinen erben vmb den weingarten gelegen ze Gerrestorf haizzet der Spiegel vnd vmb alle div hab di Jensleins von Praitnow gewesen ist dem Got genade, desselben chrieges vnd der ansprach nach dem obgenanden weingarten vnd nach Jensleins hab haben wir vns vnd alle vnser erben vorzigen gantz vnd gar also, daz wir vnd alle vnser erben fürbaz chain ansprach nach dhainen chrieg sullen haben hintz dem vorgenanden gotzhaus ze Lambach vnd gegen dem egenanden Hainrichen dem Spener vnd seinen erben vmb den oftgenanden weingarten vnd vmb Jensleins des Praitnow hab der vorgenant ist. Vnd luben stet ze baben allez daz daz vorgeschriben stet mit dem gegenbürtigen prief versigelten mit der wol ersamen Lienharten des Ekker ze den zeiten lantrichter ob der Ens vnd Jansen des Lerbuchler anhangunden insigeln. Der prief ist gegeben tausent jar drev hundert jar dar nach in dem sechtzikisten jar des sonntages ze mitter vasten.

Source Fulltext: OÖUB 7 (Wien 1876) S. 688f., Nr. 680