Ich Paul der Chrautwurm zu den zeiten hertzog Rudolfs slu^ezzler ze Chrems vergich vnd tun chunt offenwar, daz fur mich chomen ist der erber chnecht Hainreich der Spaener ze den zeiten chellner ze Lambach vnd hat an mich gevodert ain gewer vmb den weingarten, der gelegen ist ze Gerrestorf an dem Perig vnd haizzt der Spiegel dez ein gantz jeuch ist vnd der herchomen ist von Chunraten dem Chremser weylend hofmayster in Agmunder hof ze Chrems, dez ich selb rechter perchmaister pin, dovon man mir vnd alln mein erben dient ze purchrecht all jar zwaintzik wienner phenning an sand Cholmans tag, vnd hat auch der egenant Hainreich der Spaener mir dorvmb prief fürgetragen, vnd nach derselben prief sag han ich im denselben weingarten gelihen vnd an nutz vnd gewer gesatzt mit vrchund dez gegenwärtigen priefs versigelten mit meinem aygen anhangunden insigel, der gegeben ist dreutzehen hundert jar dornach in dem sechtzkistem jar an dez heyligen herren sand Georigen tag.

Source Fulltext: OÖUB 7 (Wien 1876) S. 696f., Nr. 691