Rudolffus quartus Dei gratia archydux Austrie Styrie et Karinthie dominus Carniole Marchie Slavonice ac Portusnaonis comes in Habspurch Ferretis et in Kyburch margravius Burgawgie necnon lantgrafius Alsatie omnibus Christi fidelibus in perpetuum ad quorum notitiam tenor presentium devenerit, salutem in omnium salvatore. Ad hoc ex cognate mansvetudinis benivolencia ducimur et ex liberalitate solita nostrorum principatuum incitamur et trahimur, ut que pio priorum nostrorum affectu pro monasteriorum et ecclesiarum ac militancium in eis altissimo fructu et comodo rite acta conspicimus, ea innovationis roboremus munimine et confirmacionis beneficio perhennemus. Accedentes igitur ad nostram presentiam religiosi in Christo fideles nostri devoti . . . abbas et conventus monasterii Lambacensis ordinis sancti Benedicti Pataviensis dyocesis nobis instanter et humiliter supplicarunt, quatenus privilegium ipsis et suo monasterio per recordacionis inclite quondam Leupoldum nostrum predecessorem in dictis Austrie et Styrie ducatibus indultum et traditum super quodam concambio et certis alijs libertatibus innovare et confirmare favorabiliter dignaremur, cujus quidem rivilegij tenor de verbo ad verbum inferius annotatur. Leupoldus Dei gratia dux Austrie et Styrie imperpetuum etc. (Siehe datum Wels 1222, Bd. II, pag. 639). Nos qui justis peticionibus presertim personarum ecclesiasticarum sub regula degentium aures benignas prebere cogimur et exaudicionis remedium impertiri dicta petita equitati et racioni censentes consona prescriptum privilegium ac contenta in eo singula serie presentis nostre pagine innovamus, roboramus ac eciam confirmamus volentes ipsum perpetuis temporibus in suo vigore et robore permansurum. Nulli ergo hominum liceat hoc nostre innovacionis et confirmacionis scriptum infringere vel ei in toto seu in parte ausu temerario contraire; quod si quis facere presumpserit se gravem nostram indignacionem incurrisse noverit pro eo puniendum acriter corpore et in rebus. In cujus rei testimonium evidens et roboris firmitatem presentes appensione nostri sigilli majoris fecimus conmuniri. Datum et actum Wienne prima die mensis aprilis anno domini millesimo trecentesimo sexagesimo secundo indiccione quintadecima etatis nostre vicesimotercio regiminis vero anno quarto.||
+ Wir der vorgenant herzog Ruodolf sterken disen prief mit dirr underschrift unser selbs hant. +

Source Fulltext: OÖUB 8 (Wien 1883) S. 71f., Nr. 68