Ich Niclas der Goltsmid, Andree von Pewrbach salign sun, mein eleich hawsfrau, all unser erben, wir veriehen und tun kunt offenleich mit dem briff allen den die in sehent, horent oder lesent, daz wir mit wolbedachtem mut, nach rat, weysung, gunst und willen aller unser fwnt und erben recht und redleichen versaczt haben zw der zeit und wir ez wol vermachten unser virtail aus dem hoff ze Wyclanczdorff gelegen in Waczenchircher pfarr und lehen ist von unsern genadigen herrn den Polhaimern mit allen rechten, eren, nuczen und durch recht von alter dar zw gehorent ze holcz, veld, waid, wasser, wismad, versucht und unversucht, aus unser nucz und gwer Chunrad ann Hag unserm lieben swager, purger ze Everding, seiner eleichen hawsfrau und allen iren erben in ir nucz und gwer umb acht pfunt gueter Wienner pfening, der wir von in gancz und gar verricht und bezalt sein an all schaden. Und haben in den sacz des virtail mit aller zwgehor mit herrn hant bestat aller stat in der weschaiden, daz wir allew jar jarleichen losung dar auff haben ze unser frawn tag der liechtmezz vor virzehn tag oder nach in virzehn tagen und sullen noch mugen uns die losung mit nichtew verziehn, auch sein wir dez egenanten sacz ir recht gwern und furstant fur all ansprach angevar an aller der stat und in dez not und durfft geschicht nach rechtem landes recht ob der Ens. Ging in dar an icht ab, wie sich daz fugat, dez si schaden namen, den ir ains angevar bei sein twn gereden mag unberecht und ungeswarn sein ains worten ze gelawben, den selben schaden allen sullen und wellen wir in ganczleichn ablegen und mit sampt dem haupgut widerchern daz alles sullen si haben dacz uns unsern twn daz zw auff aller unser hab di wir haben lassen oder noch gewinnen wie di benant und gelegen sei inner lancz, ausser lancz, auff wasser oder land, versucht und unversucht. War awer, daz in gelcz not geschach und den obgenanten sacz nicht lenger haben wolten noch mochten, sa sullen si uns mit gwissen an pieten ze losen, mugen noch wellen wir dann nicht losen sa haben si vollen gwalt iren oftgenanten sacz ze verseczen und verchauffen ires obgenanten gelcz da von bechomen sa nagst si mugen und gein wem si wellent also sacz recht ist. Wer auch den briff inn hat mit guetleichen iren willen und wart uns da mit mont und furpringt, der hat allew di recht di vorverschriben stent. Mit urckund des briff den wir in dar uber geben ze urchund und stater zeugnusse versigelten mit der erbarn weschaiden Hansen dez Puchar, di zeit statrichter ze Everding, und Ortolffs dez Leittnar, purger da selbs baide anhangunden insgeln, die si durch unser fleissign pet willen dar an gelegn habent in baiden und allen iren an schaden, wan ich obgenanter Niclas Goltsmid zw der zeit aigen insigel nicht het, dar under ich mein hawsfrau all unser erben uns verpenden mit unsern twn in aides weis alles daz stat haben und ze volfuren daz vorverschriben stat und mit worten begriffen ist. Der briff geben ist an sand Jacobs tag in dem snit nach Christi gepurd, da mon zalt drewzehen hundert jar und dar nach in dem drey und achczkisten jare.

Source Fulltext: StiAL, Kopialbücher, HS 16, P. Augustin Rabensteiner OSB: Documenta monasterii Lambacensis Bd. I, ab anno 992-1415, S. 374-376, Nr. 325