Petrus Spremberger decanus Lambacensis et rector ecclesie in Petenpach vniuersis et singulis ecclesiarum parochialium rectoribus plebanis vicariis cappellanis altaristis aut eorum vices gerentibus per decanatum Lambacensem vbilibet constitutis salutem in Domino et sincere dilectionis affectum ac debitam diligenciam in subscriptis; Secundum, vt vobis et cuilibet vestrum constat et constare debet, gratiam perpetuam inpetratam concessam et obtentam ab illustrissimo principe^a) domino duce Alberto Austrie etc. pro libertate bonorum et rerum mobilium etc. decencium clericorum, que - ut frequenter - ausu temerario per praecones et quoslibet alios illicitos raptores et inuasores ac detentores temere rapiuntur et violenter abstrahi videbantur clero in extremis contra canonicas sancciones omni iuris ordine praetermisso^b), huiusmodi^c) libertas penitus deducta (est) in effectum contra praedictos invasores, vt de cetero nullus dominus nec advocatus iudex uel praeco et ceteri officiales - quocunque nomine censeantur -, res et bona dicti decanatus plebanorum vicariorum et presbyterorum ammodo inuadere valeant et debeant^d) quouis modo, sed quod quilibet vestrum potest bona sua testare legare, quibus voluerit et praesertim creditoribus amicis vel ecclesie, prout in copia eiusdem libertatis clare videre poteritis cum praesentibus vobis exhibendis sigillo meo inpresso auctenticata et auscultata cum originali gratiosa litera de verbo ad uerbum etc. Cum reuera dicta originalis litera libertatis vobis omnibus et singulis comode et cuilibet vestrum pro praesenti diuisim ad vos defferre sine periculo non valeatur et timeatur certis ex causis, quare vobis dominis rectoribus plebanis vicariis cappellanis altaristis et omnibus aliis et singulis presbyteris, qui huius modi priuilegio et libertate gaudere voluerint et ut in instrumento obligacionis et constitucionis procuratoris super facto eodem clarius contineatur, et cuilibet vestrum in solidum districte praecipiendo mando in virtute sancte obediencie et sub excomunicationis pena iam late sine canonica monicione praemissa, nisi feceritis et parueritis cum effectu, ut mandatur, quatenus^e) proxima feria tercia post instans festum sancti Michahelis archangeli proxime affuturi^f) inclusiue in ciuitate Welse sitis et conpareatis personaliter bona hora ad peragendum aniuersarium et memoriam illustrissimorum dominorum ducum de Austria et progenitorum suorum etc., vt in dicta litera libertatis sew copia contineatur, ac (ad) omnia alia studiose et deuote perficiendum et faciendum^g), quae in dicta litera libertatis concessionis contineantur, sub pena et penis in dicta litera contenta sew contentis ac demum ibidem acturi facturi et tractaturi de vtilitatibus et bonis omnium nostrorum necessitatibus et de obseruacione praemissorum in futuris tenenda et gubernanda nec non ad videndum conputari et rationem faciendam de perceptis et expositis facti praedicti per honorabilem virum dominum Petrum plebanum in Calhaim pro curis etc. Alias, si qui negligentes rebelles inobedientes remissi ac lassi - quod absit -existerent quouismodo, scituri (sitis), quod contra eosdem grauiori pena procedetur, quam merito poterunt euitare. Datum et scriptum in Petenbach in die sancti Augustini doctoris egregii meo sub sigillo anno domini millesimo trecentesimo octuagesimo nono etc.

Source Fulltext: OÖUB 10 (Wien 1933) S. 565-567