Wir Vlreich von Gots genaden abt ze Lambach vergehen vnd tun chunt offenbar mit dem brif allen, den er fürchumpt, daz für vns chomen sind di erbern läwt gemainch leich auz vnser Vrawn czech ze sand Johanns vnser pharr vnd habent mit veraintem rat vnd woll bedächtichleich recht vnd redleich ledichleich gemacht vnd geben ze ainem ewigen selgerät ir gut gelegen auf dem Physterperg vnd dij wis ze obern Swaig gelegen pey dem Spekpach vnd ist genant dez Cholben wis mit allen den ern rechten vnd nutzen, di ze dem benanten gut vnd ze der wis gehörnt vnd davon bechomen mugen, ze holz ze veld versucht vnd vnuersucht in vnsers conuents oblay in solicher beschaiden, daz in all wochen ewichleich am Montag ain mess ze sand Johanns in vnserer pharrchirichen auzgericht vnd gelesen schol werden den obgenante gemainchleich mann vnd vrawn, di an der obgenanten czech sind oder furbaz darin choment, ze hilf vnd ze trost ir all sel vnd durch all irr voruodern vnd nachchomen sel hail willen. Vnd an welichem Montag die obgenante wochenmess nicht gelesen vnd volpracht wirt in der mazz, so uor begriffen ist, wann dann der ob genanten czech czechmaister vnsern conuent mit dem brif, den wir in vnd vnser conuent dar vumb geben haben, monent oder wer vns der obgenanten czech wegen damit mont mit irm willen, der schol vnd mag sich dez obgenanten guts vnd der wis mit aller zugehörung vreileich vnderwinden vnd daz inne haben als lang, daz di versavmpt oder di versavmpten mess gancz vnd gar volpracht wird oder werdent, daran schol den obgenanten czechläwten vnd der czech dhain irrung geschechen an geuärd, als in dem brif, den sy von vns vnd vnserm conuent dar vmb habent, begriffen ist. Vnd wann daz, (waz) versavmpt ist, uolpracht wirt vnd eruollet, so ist daz obgenant gut vnd di wis mit aller zugehörung her wider vnser vnd vnsers conuents in vnser oblay ledigs gut vnd schullen vnd mugen vns dez benanten guts vnd der wis vreileich vnderwinden an irrung. Vnd daz daz allcz also stät gancz vnd vnuerchert beleib, geben wir den brif versigelten mit vnserm anhan gunden insigel, der geben ist nach Christs gepurd drewczehenhundert jar darnach in dem ains vnd newnczigistem jar an vnser Vrawentag ze Lichtmess.

Source Fulltext: OÖUB 11 (Wien 1983) S. 13-16