Ich Phylipp Etlinger, ich Agnes sein swester, Phylippen dez Etzlinger seligen chinder und all unser eriben vergehen und tun chunt offenbar mit dem brief allen, den er furpracht wirt, daz wir emphangen und eingenomen haben von den erwirdigen geistleichen herren hern Ulreichen abpt ze Lambach und von seinem convent vier und zwainczig phunt beraiter Wyenner phening, di in und irm gotzhaus unser vorgenanter vater berait auf ain wis, genant di Pischolfin, gelegen in Newnchiricher pharr, gelihen hat, dez er uns ainen satzbrif hinder im lazzen hat, den wir ze der tzeit, als der gegenwurtig brif geben ist, nicht gehaben machten, also daz wir di vorgenanten herren und ir gotzhaws der vorgenanten vir und tzwaintzig phunt Wyenner phennig und dez vorgenanten satzes gantz und gar ledig und los sagen furbaz nymermer dar nach ze sprechen weder mit recht noch an recht an gever, und wo der vorgenant satzbrif furchumpt, da sol er ain toter brif sein und wider den gegenwurtigen brif gegen den vorgenanten herren und irs gotzhaws gut dhain chraft haben, also daz er uns ist an nutz und den vorgenanten herren und irm gotzhaws an schaden. Wer aber, daz sew von dez vorgenanten satzes und auch von dez satzbrifs wegen ze schaden chamen, wi sich daz fugt, den selben schaden allen mit sampt den vorgenanten vir und tzwaintzig phunt Wyenner phennig loben und versprechen wir in abzelegen, und sullent sew daz haben datz uns und datz unsern trewn dar tzu auf aller unser hab, wo wir di haben oder lazzen auf wazzer oder auf land, versucht und unversucht, di sol dar umb ir phant sein und mugent sich der an recht, an aid, an furbot und an andrew nottaiding wol alz vil underwinden, daz sy hawpguts und schadens da von bechoment, daz ist unser gutleicher will und wart und sullen und wellen sew auch in dhainerlay weys noch yemant ander von unsern wegen daran engen noch irren an gever. Und daz in daz allez also stet gantz und gar unverchert beleib, geben wir in und irm gotzhaws den offenn brif versigelt mit mein obgenantz Phylippen dez Eczlinger aygem anhangunden insigel. Und ze ainer pezzorn beczeugnuss und sicherhait haben wir gepeten unser besunder lieb frewnt Ulreichen den Tanner und Micheln den Lerbuller, daz di irew insigel an dem brif gehangen habent in payden und irn eriben an schaden, dar under ich mich obenantew Agnes verpint mit meinen trewn allez daz stet ze habn und ze volfuren daz oben an dem brif geschriben stet, der brif ist geben nach Christi gepurd drewczehen hundert jar dar nach in dem vir und newntzigisten jar an mitichen vor dem palmtag.

Source Fulltext: StiAL, Kopialbücher, HS 16, P. Augustin Rabensteiner OSB: Documenta monasterii Lambacensis Bd. I, ab anno 992-1415, S. 422-424, Nr. 360