Ich Peter von Geczelsdorf mein eleich hawsfraw vnd alle vnser paider eriben uergehen vnd tun chunt offenbar mit dem brif allen, den er fürpracht wirt, daz vns vnser genediger herr abpt Symon ze Lambach durich vnser vleizzigen pet willen geurlaubt hat ze farn ab der halben hueb ze Geczelsdorf gelegen in Vorichdorffer pharr, di wir von im vnd von seinem gotzhaws ze rechten eribrecht haben in solicher beschaiden, daz wir im ierlichen allez daz dauon dinen schullen vnd wellen, daz wir von alter nach dez gotzhaws ze Lambach vrbarpuch lawt daruon dinen schullen, vnd wellen auch noch schullen dhain wandlung damit haben weder mit uerseczen noch mit uerchauffen noch mit dhainerlay weys an sein vnd seiner nachkomen hannt vnd guten willen vnd schullen vnd wellen auch allez daz von dem obgenanten vnserm eribrecht leyden vnd dulden, daz ander eribler dez gotzhaws ze Lambach leydent und duldent. Sew haben auch hintz vns allew dew recht, di sew hintz andern irs gotzhaws eriblern habent, wo wir sein, ez sey in stettn oder in merkchten oder anderswo, daz wir der fürsten dez landes freyung oder freybrif noch dhainer herschaft, di wir gewinnen mugen oder darhinder wir vns verphlichten mugen, nicht geniezzen schullen noch wellen geistleich noch werltleich gentzleich an geuer vnd waz wir darwider redten oder teten, ez wer geistleich oder wertleich, daz hat der obgenant vnser genediger herr abpt Symon vnd sein conuent allez behabt vnd wir uerloren an geuer. Mit vrchund dez briffs versigelt mit der erbern vnd weysen Weykcharcz dez Trunten diczeit probst vnd richter ze Lambach vnd Michels dez Lerwuller paider anhangunden insigeln, di sew durich vnser vleizzigen pet. willen in vnd allen irn eriben an schaden an dem brif gehangen habent, darvnder ich mich obgenanter Peter von Geczelsdorf mit sampt mir mein hawsfraw vnd vnser paider eriben verpinden mit vnsern trewn in aidesweys allez daz stet ze haben, daz in dem brif begriffen ist. Daz ist beschehen nach Christi geburt drewzehenhundert jar darnach in dem sechsvndnewnczigisten jar an Phincztag vor sand Rudprechtcztag.

Source Fulltext: OÖUB 11 (Wien 1983) S. 493-494