In Christi nomine Amen. Anno natiuitatis eiusdem millesimo tricentesimo nonagesimo sexto indiccione quarta die uero decima mensis Decembris hora vesperorum uel quasi pontificatus sanctissimi in Christo patris ac domini nostri domini Bonifacii diuina prouidencia pape none anno octauo coram venerabili in Christo patre ac domino domino Symone monasterii Lambacensis ordinis sancti Benedicti abbate nec non coram honorabilibus viris ac dominis magistro Heinrico de Scherdinga decano Lambacensi etc. et Johanne rectore parrochialis ecclesie im Gmvnden Patauiensis dyocesis auditoribus seu inquisitoribus per venerabilem virum ac dominum Hartliebum de Puchperkch ecclesie Patauiensis canonicum nec non archydyaconum Lambacensem specialiter ad infrascripta deputatis meique notarii publici subscripti presentia copiosa constituta est^a) multitudo hominum masculini sexus plebesanorum ad ecclesiam parrochialem in Wydemspach et eius filialem ecclesiam in Rewthaim parte ex vna et ad ecclesiam parrochialem in Swanns ac eius filiales ecclesias in Tezzelprun et in Rusdorf antedicte dyocesis parte ex altera spectancium. Vocati igitur et specialiter recquisiti sunt^b) per supradictos dominos magistrum Heinricum decanum et Johannem plebanum in Gmvnden auditores seu inquisitores memoratos - primo plebesani in Wydemspach at in Rewthaim super conscienciis ipsorum, aut locus, qui Val dicitur, ad ecclesiam parrochialem in Wydemspach vel eius filialem ecclesiam in Rewthaim aut ad ecclesiam parrochialem in Swanns uel eius filialem ecclesiam in Tezzelprun spectare videatur. Qui quidem plebesani collocutione seu deliberacione inter se prehabita pecierunt quendam Vlricum officialem de Tzell, quatenus idem Vlricus nomine et uice ipsorum omnium et singulorum intencionem ipsorum, quantum ipsis super predicta requisicione constaret, ipsis dominis auditoribus praescriptis reuelaret. Dictus igitur Vlricus uiua^c) voce oraculum^d) protulit talia seu illa similia verba: Domini mei, constat mihi et cum hoc hiis, qui me petierunt, fundum versus Rewthaim existens usque ad medium aque, que Truna dicitur, et omnia molendina seu edificia, quecunque inibi fundata, iure seculari ad aduocaciam in Wels et ad iudicium in Moz sed iure spirituali ad ecclesiam filialem in Rewthaim ecclesiae parrochialis in Wydemspach annexam pertinere et pertinuisse ab antiquo. Similiter dixerunt discreti viri Wolfgangus Daxperger Hertnidus Chastner Krafto Anhang Magus Reutter Magus Jungwirt Heinricus Schoberl et Heinricus de Tewsing cum pluribus aliis. Concordauerunt antedictis Christanus Fronberger iudex civitatis in Gmunden et Albertus Newnmarkchter ciuis ibidem dicentes nomine et uice omnium et singulorum conciuium suorum, supradictus locus, qui Val dicitur, ad ecclesiam filialem in Rewthaim antedictam de iure uideatur pertinere. Deinde requisiti per sepedictos dominos auditores dominus abbas Lambacensis supradictus et dominus Johannes Paltinger rector parrochialis ecclesie in Petenpach dixerunt, quod secundum estimationem ipsorum supradictus fundus^e) et locus dictus Val pocius in Rewthaim quam in Tezzelprunn uideatur pertinere. Contra vocati et specialiter super conscienciis ipsorum requisiti sunt^f) plebesani in Swanns in Tezzelprunn et in Rusdorf; produxit Karolus rector parrochialis ecclesie in Swanns duas litteras wlgares, quarum vnius principium erat talis: Ich Ludwig der Swensleinsperger vnd ich Hensel der amptman von Gleczing vnd ich Jekel der amptman von Gleczing etc. finis uero erat talis: versigelt mit der erbern vnd weysen Fridreiches des Pewzzleins in dem Puch aufgedrukchten insigel, principium alterius erat talis: Ich Nicla der Mayr von Vicht vnd ich Chuon vnd ich Albel der Selbenhaimer etc. finis erat talis: versigelt mit dez erbern weysen vnd beschaiden Niclas des Perntaler aufgedrukchtem insigel, quas quidem litteras sigillatas, prout etiam sigillate fuerant producte, petiit antedictus dominus Karolus per supradictos dominos commissarios seu auditores presenti cum instrumento transmitti domino archidyacono supradicto. Concordauerunt cum predictis litteris discreti viri Phylippus de Chochlöffling ciuis in Swanns, Fridlebus de Lebrechczhaim, Otto Chepf, Petrus et Wernhardus de Uicht cum pluribus aliis nomine et uice omnium et singulorum plebesanorum in Swanns in Tezzelprun et in Rusdorf super conscienciis ipsorum dicentes, ipsis constare et a parentibus et senioribus eorum audisse, supradictum locum, qui Val dicitur, ad ecclesiam filialem in Tezzelprun, que est annexa ecclesie parrochiali in Swanns de iure spectare omniaque hominum corpora circa sepedictum locum Val vocatum submersorum in cimiterio dicte filialis ecclesie in Tezzelprun fuisse et esse presenti tempore sepulta et etiam ab antiquo. Super quibus omnibus et singulis supradicti domini commissarii seu auditores pecierunt sibi et dictis partibus per me notarium publicum subscriptum vnum vel plura publicum seu publica confici instrumentum seu instrumenta. Acta sunt hec in sepedicto^g) loco, qui Val dicitur, in domo edificata ibidem anno indiccione die mense hora et pontificatu quibus supra presentibus discretis et circumspectis viris ac domini Symone dicto Perigmair, Johanne Haweysen in Püchel et in Newnkyrichen vicariis Alberts dicto Weizz et Johanne Ludwici protunc sociis in Gmvnden, Thoma et Stephano pro tunc sociis in Swanns, presbiteris Patauiensis dyocesis antedicte cum pluribus aliis presbiteris et laycis testibus fidedignis ad premissa uocatis pariter. ||
Et ego Johannes Thobel de Euerdinga clericus Patauiensis dyocesis publicus auctoritate imperiali notarius requisicionibus et reuelacionibus seu narracionibus ac supradictarum litterarum productioni omnibusque aliis et singulis supradictis, dum, sic ut premittitur, agerentur et fientur, vnacum prenominatis testibus presens fui eaque omnia et singula sic fieri uidi et audiui, ideo super hiis hoc presens publicum instrumentum manu mea propria conscriptum confeci signoque et nomine meis soliter et consuete signaui rogatus et requisitus in euidens testimonium omnium et singulorum premissorum.

Source Fulltext: OÖUB 11 (Wien 1983) S. 567-570