Wir Simon von Gotes genaden abpt ze Lambach vnd der gantz conuent desselben klosters uergehen vnd tun kunt offenbar mit dem brif allen, den er fürpracht wirt, daz wir mit wolbedachtem mut vnd mit veraintem rat recht vnd redleich ze ainem rechten eribrecht uerlihen haben vnser lehen genant dez Hayder lehen ze Wintpozzing gelegen oberhalb dez Hewermair hub mit alle dem, daz durich recht vnd von alter dartzu gehört vnd dauon bekomen mag ze holtz ze ueld ze wismad uersucht vnd vnuersucht Fridreichen vnd Laurentzen genant di Silwer ir paider hawsfrawen Elspeten vnd Margarethen vnd allen ir uirer eriben in solicher beschaiden, daz sew daz obgenant lehen stiftleich vnd pawleich schullent innehaben vnd schullent vns vnd vnserm gotzhaws allew iar dauon dinen vnd raichen an vnser Frawntag ze der dinstzeit sechtzig newer Wyenner phennig ze weinfur, an dem Prehentag dreizzig Wyenner phennig ze pawstewr vnd an sand Jörigentag tzehen Wyenner phennig ze uogtstewr. Wir offen auch, wer daz obgenant lehen inne hat, der schol dhain wandlung damit haben weder mit uersetzen noch mit uerchauffen noch mit dhainerlay weys an vnser hant vnd guten willen vnd schol auch allez daz dauon leiden vnd dulden, daz ander vnsers gotzhaws eribler gein vns vnd vnserm gotzhaws leident vnd duldent vnd vnuertzigen vnsers gotzhaws rechten in allen sachen. Das bestetigen wir also mit dem offen brif versigelt mit vnsern paiden anhangunden insigeln. Daz ist geschehen nach Christi geburde drewtzehenhundert jar dar nach in dem sechsvndnewntzigisten an sand Thomans abent.

Source Fulltext: OÖUB 11 (Wien 1983) S. 575