Wir Symon von Gotes genaden abbt ze Lambach und der ganntz convent dessellen klosters vergehen und tun kunt offenbar mit dem brif allen den er furpracht wirt, daz wir mit wolbedachtem mut mit aller eriben willen und wart recht und redleich ze ainem rechten eribrecht verlihen haben daz gut auf dem Videlperig gelegen in Welser pharr und allez daz durich recht und von alter dar tzu gehort und da von bekomen mag ze holtz, ze veld, ze wismad, versucht und unversucht, daz rechtz eribrecht von uns und unserm gotzhaws ist, Hansen von Lochen, Chunraten Kyrichmair, Ulreichen auf dem Videlperig, Margarethen, Hansens ab dem Mullehen hawsfrawn, und Annen, Hansen dez Hungerperger eleichen hawsfrawn, di allew geswistred sind, Wernhartz dez Videlperger seligen kinder und allen ir fumfer eriben in solicher beschaiden, daz sew daz egenant gut stiftleich und pewleich schullent inne haben und schullent uns und unserm gotzhaws allew jar da von dinen und raichen an unser frawn tag ze der dinstzeit sechtzig newer Wyenner phening und an dem prehentag sechtzig Wyenner phening ze pawstewr. Wir offen auch, wer daz obgenant gut inne hat, der schol dhain wandlung da mit haben weder mit versetzen noch mit verchauffen noch mit dhainerlay weys an unser hannt und guten willen, und schol auch allez daz da von leyden und dulden, daz ander unsers gotzhaws eribler gein uns und unserm gotzhaws leident und duldent und unvertzigen unsers gotzhaws rechten in allen sachen. Daz bestetigen wir also mit dem offen brif versigelt mit unsern paiden anhangunden insigeln. Geben nach Christi geburde drewtzehenhundert jar dar nach in dem syben und newntzigisten an phintztag vor unser frawn tag als sy geborn ward.

Source Fulltext: StiAL, Kopialbücher, HS 16, P. Augustin Rabensteiner OSB: Documenta monasterii Lambacensis Bd. I, ab anno 992-1415, S. 454f, Nr. 384