Wir Simon von Gotes genaden abbt ze Lambach vnd der gantz conuent desselben klosters uergehen vnd tun kunt offenbar mit dem brif allen, den er furpracht wirt, daz für vns komen sind Hanns Margreth Elspeth Vlreich vnd Peter Andres von Niederntopel seligen kinder vnd ir muter Kathrey vnd habent mit wolbedachtem mut mit vnser hant vnd mit gantzer stet recht vnd redleich ze chauffen geben ir eribrecht, so sew gehabt haben auf dem lechen datz Niderntopel gelegen in vnsrer pharr vnd alles, daz durich recht vnd uon alter dartzu gehört vnd dauon bekomen mag ze holtz ze veld ze wismad uersucht vnd vnuersucht, Wernharten der egenanten Kathrein son vnd der obgenanten kinder rechten bruder vnd seiner eleichen hawsfrawn Annen vnd allen ir paider eriben vmb ain gelt, dez sew gantz vnd gar bericht vnd beczalt sind, in solicher beschaiden, daz sew vns vnd vnserm gotzhaws allew jar von dem egenanten gut dinen vnd raichen schullent an vnser Frawn tag ze der dinstzeit virtzig newer Wyenner phening vnd sechs huner, an sand Michelstag fumf Wyenner phening ze pawstewr vnd an sand Jorigentag tzehen Wyenner phening ze uogtsteuer Wir offen auch, wer datz obgenant lechen inne hat, der schol dhain wandlung damit haben weder mit uersetzen noch mit uerchauffen noch mit dhainerlay weys an unser hant vnd guten willen vnd schol auch allez daz dauon leiden vnd dulden, daz ander vnsers gotzhaws eribler gein vns vnd vnserm gotzhaws leident vnd duldent vnd vnverczigen vnsers gotzhaws rechten in allen sachen. Daz bestetigen wir mit dem offen brif versigelt mit vnsern paiden anhangunden jnsigeln, geben nach Christi geburde drewtzehenhundert jar, darnach in dem syben vnd newntzigisten an sand Jacobsabent.

Source Fulltext: OÖUB 11 (Wien 1983) S. 628-629