Wir Symon von Gotes genaden abpt ze Lambach und der ganntz convent desselben klosters vergehen und tun kunt offenbar mit dem brif allen den er furpracht wirt, daz fur uns komen sind Hanns Schacz von Megling und sein eleich hawsfraw Elspet und habent mit aller ir paider eriben gutleichen willen und wart recht und redlich ze chauffen geben ir halbew hub gelegen ze Niderhardarn in Newnkyricher pharr und allez, daz durich recht und von alter dar tzu gehort und da von bekomen mag ze holcz, ze veld, ze wismad, versucht und unversucht, Petern dem Schustlein, seiner eleichen hawsfrawn Annen und allen ir paider eriben umb ain gelt, dez sew gantz und gar von in bericht und betzalt sind ze rechten tegen und an scheden. Und haben wir in auch di egenant halben hub mit aller irer tzugehorung, di recht eribrecht von uns und unserm gotzhaws ist, ze ainem rechten eribrecht verlihen in solicher bebeschaiden, daz sew uns und unserm gotzhaws allew jar davon dinen und raichen schullent an unser frawn tag ze der dinstzeit sechtzig newer Wyenner phening und vir huner, an sand Michelstag fumf Wyenner phening ze weinfur, an dem prehentag dreizzig Wyenner phening ze pawstewr, und an sand Gorigen tag fumf Wyenner phening ze vogtstewr und nicht mer. Wir offen auch, wer di obgenant halben hub inne hat, der schol sey stiftleich und pewleich inne haben und schol dhain wandlung da mit haben weder mit versetzen noch mit verchauffen noch mit dhainerlay weys an unser hannt und guten willen, und schol auch allez daz davon leyden und dulden, daz ander unsers gotzhaws eribler gein uns und unserm gotzhaws leident und duldent und unvertzigen unsers gotshaws rechten in allen sachen. Daz bestetigen wir also mit dem offen brif, versigelt mit unsern paiden anhangunden insigeln. Geben nach Christi geburde drewtzehenhundert jar dar nach in dem syben und newntzigisten an sand Lamprechtz tag.

Source Fulltext: StiAL, Kopialbücher, HS 16, P. Augustin Rabensteiner OSB: Documenta monasterii Lambacensis Bd. I, ab anno 992-1415, S. 455f, Nr. 385