Wir Symon von Gotes genaden abpt ze Lambach vergehen vnd tun kunt offenbar mit dem brif allen, den er furpracht wirt, daz fur vns komen Hanns Tzetter von Strazz sein eleich hawsfraw Margareth vnd habent mit aller ir paider eriben gutleichen willen und wort mit vnserer hannt vnd mit gantzer stet recht vnd redleich ze chauffen geben ir haws gelegen ze Lambach pey dem Pach ze negst Michels Lerwuller haws, also ez mit hofmarich vmbuangen ist mit dem gärtlein vnd mit der pewnt, di da pey gelegen sind vnd ze dem haws gehörnt, vnd mit alle dem, daz durich recht vnd uon alter dar tzu gehört vnd dauon bekomen mag uersucht vnd vnuersucht Hansen dem Gewderlein vnd allen seinen eriben vmb uir vnd tzwaintzig phunt Wyenner phenig, der sew gantz vnd gar von in bericht vnd bezalt sind ze rechten tegen vnd an scheden in solicher beschaiden, daz der egenant Hanns Gewderl vnd sein eriben vns vnd vnserm gotzhaws allew jar daruon dinen vnd raichen schullent des negsten Svntags nach dem Prehentag tzehen Wyenner phennig ze rechten purkchrecht. Wir offen auch, wer daz obgenant haws vnd sein tzugehörung inne hat, der schol dhain wandlung damit haben weder mit uersetzen noch mit uerchauffen noch mit dhainerlay weys an vnser hannt vnd guten willen vnd schol auch allez daz dauon leiden vnd dulden, daz ander vnsers gotzhaws hindersezz ze Lambach gein vns vnd vnserm gotzhaws leident vnd duldent vnd vnuertzigen vnsers gotzhaws rechten in allen sachen. Vnd daz daz allez also stet gantz vnd vnuerchert beleib, geben wir den offen brif versigelt mit vnserm anhangunden insigel. Der brif ist geben nach Christi geburde drewtzehen hundert jar darnach in dem achtvndnewntzigisten an sand Erhartstag.

Source Fulltext: OÖUB 11 (Wien 1983) S. 580-581